Diabierna, 13 di november, e team di Gamma IT Solutions, desaroyador di Payroll Pro HRM, a bishita e oficina di N.V. Elmar pa trese bolo pa tur 210 trahado di e compania.
E motibo di e bishita aki ta pa gradici N.V. Elmar, di manera special e HR Manager, Sra. Melissa Ritfeld, pa e confiansa deposita den e Modulo di HRM di Payroll Pro HRM.
N.V. Elmar, un cliente fiel di hopi aña caba di Payroll Pro HRM, ta haci uzo di e software pa draai e payroll di tur empleado di nan compania.
Recientemente, N.V. Elmar a cuminsa haci uzo di e Modulo di HRM tambe. E Modulo di HRM tin varios funcionalidad cu por wordo uza door HR Managers y HR Officers, manera modulo di training, checklists, mail merge, modulo di evaluacion y hopi mas.
Melissa Ritfeld ta comenta “Nos ta hopi contento cu e colaboracion cu Gamma IT Solutions, nan semper ta man habri pa yuda nos den cualkier momento.”
Teiry Croes di Gamma IT Solutions ta splica cu Payroll Pro HRM por yuda tur organisacionan na Aruba y den Caribe. E ta comenta “Payroll Pro HRM por adapta completamente na e necesidadnan di cada compania, sea nan ta grandi of chiquito. Payroll Pro HRM ta wordo desaroya local na Aruba y esaki ta duna nos e oportunidad pa customize e software na e deseonan di cada cliente.”
Gamma IT Solutions ta contento cu N.V. Elmar a escohe pa uza e Modulo di HRM di Payroll Pro HRM, cu ta un producto local di un compania local y cu ta ofrece support local.
Frank Baks, Director di Gamma IT Solutions, ta comenta “Nos semper tabata tin un hopi bon relacion profesional cu e team di N.V. Elmar. Nos ta sumamente contento di por ofrece nan awo e Modulo di HRM di Payroll Pro HRM, di e manera aki nan por integra tur informacion di nan empleadonan den un sistema completo y eficaz.” Un biaha mas Gamma IT Solutions ta gradici Sra. Ritfeld, e departamento di HR y team di N.V. Elmar pa escohe Payroll Pro HRM.
