Sirbi Dios 50% y biba pa mundo 50% ta imposibel

E fenomeno di amargura, cual ta un variante di orguyo, rabia, odio y duresa di curason, ta e causa di falta di pordon den hopi famia. Y ta algo cu Dios ta tuma hopi na serio (Mateo 6 vers 14+15).

Mayoria caso di falta di pordon ta basa riba: Infieldad, herencia, rechaso, finansas, maltrato, mentira , violencia domestico, abuso etc.

Ta yega tempo pa mayor pordona nan yuinan y yuinan pordona nan mayornan. Pa ruman pordona ruman, dicon? Pasobra esey ta boluntad di Dios cu ta pordona tur hende. Pasobra no tin hende perfecto, nos tur a haci pica, pero ora nos pordona y duna un hende un oportunidad mescos cu Dios a duna nos, nos ta riba e caminda di perfeccion y santidad.

Den Mateo capitulo 18 vers 21 te cu 35 e palabra di Dios ta splica ampliamente tocante pordon.

Pero bo tabata sa cu sanacion tambe ta pordon di Dios (lesa Marco capitulo 2 vers 5 te cu 13).

Y no lubida di lesa e historia di e paralitico na e tanki di awa di Betesda, cu tabata paralitico pa 38 aña y lesa specialmente e verso 11 te cu 15 pa asina nos por mira kico compasion y pordon di pica por haci.

Awo tin hopi hende ta bisa cu pordon ta un proceso, awel Dios ta duna cada hende nan propio boluntad y ta bo mes ta dicidi cuanto bo ta dura den e proceso di pordon. Sea bo ta lihe pa pordona y lubida of bo kier carga e maleta di falta di pordon pa hopi tempo riba bo lomba yena cu stress y depresion y lubida locual Hesus a bisa den Mateo 11 vers 28.

Mantene hende riba bo curason y husga hende ta splica na tur hende den Romanos Capitulo 2 versiculo 1-11, cual ta papia di capricho y un curason cu no kier arepenti y no kier pordona. Bo ta aumenta furia pa bo mes den e di furia y huicio di Dios.

Hopi biaha nos ta busca rason aki na tera y sin wak e pordon cu ta bini for di shelo. Un hende por faya cu bo aki na tera cual ta dunabo un rason contra dje, pero Dios cu ta sinta riba su trono den shelo ta mira e cos diferente. Pasobra Dios no tin excepcion di persona, mescos cu el a pordona bo, pasobra nos tur a faya. E ta pordona bo prohimo tambe, corda riba e historia di e Fariseo y e publicano (Lucas 18 vers 9- 14).

Tin hopi cos den nos bida cu nos lo no mira claridad den dje, cu no ta e momento cu nos pordona di curason y laga los for di haci y papia maldad.

Laban tabatin Jacob riba su curason, pero Dios a avis’e pa e wak con e ta trata Jacob (Genesis capitulo 31 vers 24).

Pa trece paz y armonia den hogar y asina crea un ambiente caminda e Spirito di Dios por move tur momento. Tur hende mester ta den obedencia na Dios. Nos mester yega na e caminda cu nos ta pordona otro di curason manera Dios mes a pordona nos.     

Romanos capitulo 12 vers 2 ta bisa: Y no sea conforme e mundo aki, ma sea tranforma pa medio di e renobamento di boso mente pa boso por comproba kico ta e bon, agradabel y perfecto boluntad di Dios.

Sinceramente,

Pastor Marcel Balootje.