Sir Hensley Meulens un exito na e Baseball Aruba Coaches Clinic 2017

Diadomingo un siman prome cu e Baseball Aruba Coaches Clinic, e General Manager di New York Yankees Sr. Brian Cashman ta yama Sir Hensley Meulens pa un interview pa e trabou di Manager di e ekipo mas reconoci na mundo, Yankees. Algun dia prome San Fransisco Giants a promove Meulens di hitting coach pa bench coach y awor un oportunidad mas grandi a habri pa e coach di hermana isla Curacao.

Diahuebs Meulens tawata den un entrevista cu a dura 8 ora largo cu diferente departamento di Yankees y di New York e la logra bula strit pa Aruba pa asina ta presente na e prome Baseball Aruba Coaches Clinic. Diasabra atardi pa 3or na e ballroom na Paseo Herencia a habri e seminario e Coach di University of Northern Colorado Kainoa Correa. Kai ta un specialista di infield y su demonstracion di diferente drills a impressiona esnan presente. Despues a sigui cu nos mesun astro Eugene Kingsale cu a papia di e arte di toke di bala y robo di base. Den su mayoria e Coachnan a bin pa mira Hensley Meulens, cu tin un respet grandi entre e Coachnan pa su logro cu e ekipo di San Fransisco Giants unda cu na 3 occasion a sa di titula World Series Champions como hitting coach. Mas aun Meulens ta actual manager di Team Kingdom of the Netherlands cu tawatin un exitoso torneo durante e World Baseball Classic na Maart ultimo. Meulens a cuminsa na bisa cu e ta contento di mira tanto Coach presente y cu un Coach mester ta habri pa sinja, niun hende no sa tur cos di baseball y e mes ta sinja tur dia algo nobo. Tambe e la enfatisa cu un mucha te na grandi mester tin placer pa e wega y cu si e frustra lo e no jega veld mas y ta importante pa scucha di bo hungadornan.

Meulens su experiencia ta amplio y varios Coach di Aruba a hacie preguntanan alcaso. Un di nan ta e storia di Pablo Sandoval cu a cosecha hopi exito cu Giants y ora e la bai Boston Red Sox no por a logra mesun exito. Aki ta unda Meulens a splica cu hopi biaha e tin cu actua como un psicologo, unda cu Sandoval a hanja problema cu Giants pa falta di communicion interno y no tawatin nada di haber cu su bateo. Director Greg Short di BioPitch New Jersey a duna su charla tocante di pitcheo y con nan ta develop un atleta den tiramento di bala di baseball. Greg a infatisa cu tin un diferencia entra tira bala y pitcha, tur mucha mester wordo sinja con pa tira bala. Mas aun e la bai den detalle den preparacion y con ta recover di un dia di tiramento. Greg a trece como invitado Ryan Harvey cu tawata firma cu e organisacion di Texas Rangers. Finalmente nos a sera e anochi cu un panel di discussion unda tur nos invitadonan a subi escenario hunto cu Calvin Maduro Internacional Scout di Baltimore Orioles, Jiandido Tromp actual outfielder cu Readin Fightin Phils y Brian Larmonie Scout di Cleveland Indians, unda nan a bai ariba diferente topico di baseball hopi interesante special pa esnan interesa pa cu nan yiunan jega na hunga  profesional kiko nan ta mira den hungadornan. Aki ta unda Meulens a infatisa cu pa su persona e ta mas importante e hungador studia y bai bon na school. E di dos dia a sigui diadomingo mainta tempran unda a mira e condicion di tereno ariba Flatstone Ballpark unda a sigui e parti practico.

Kai Correa a habri cu su warmup drills sigui pa Greg Short di BioPitch cu warmup pa pitcher, despues Meulens a duna su parti di bateo y drills ariba batting tee y finalmente Eugene Kingsale a termina cu demonstracion di toke y robo di base. Nos ta sumamente satisfecho con e dos dianan a bai y e Coachnan a keda contento. Henter aña e
Coachnan ta competi cu otro y bai cas, finalmente nan por a sinta hunto y combersa di baseball. Mira innovacion den e deporte y hiba discussionan sano pa asina engrandese e deporte. Nos di Baseball Aruba kier a gradici nos sponsernan cu a logra haci e dos dianan aki posibel. Na ATCO Concrete Products cu semper a apoya baseball na Aruba, na Lotto pa Deporte cu na ultimo ora a balora e proyecto aki y a duna su sosten, na Paseo Herencia pa e localidad y cooperacion infinito, na DAMA NV y Eumar Lock and Key Services, na SUBWAY cu ta apoya nos hobenan di Little League y Benjamin Security Services un mil di danki. Awor tur preparacion ta cuminsa pa otro aña, Kai Correa a keda impressiona cu e seminario y lo desea di bolbe Aruba. Sr. Meulens a laga sa cu semper nos lo por conta cu su sosten, sin su persona lo e evento aki lo no tawata un exito y otro anja lo e bira aun mas grandi.