SIP: Preocupa cu estado di libertad di prensa

Sociedad Interamericana de Prensa (SIP) a finalisa e Reunion di Mita Aña, celebra dia 13 pa dia 15 di April na Medellin, Colombia, cu su conclusionnan caminda cu, entre otro asunto, ta condena di manera energico e violencia contra periodistanan. E reunion a conta cu presencia di Presidente di Colombia, cu a tira un discurso na tur e periodistanan presente. Headlines Group (24ora.com) tabata e unico medio di Aruba presente.

Conclusionnan di e reunion

“E asesinato di Paul Rivas, Javier Ortega y Efrain Segarra, miembronan di redaccion di El Comercio di Ecuador, a presenta nos e oportunidad di reflexiona profundamente riba e papel cu nos ta hunga den e defensa di libertadnan fundamental di expresion y di prensa. Sistematicamente nos a pronuncia di manera energico contra di e asesinatonan y desaparicion di periodistanan. Den e ocasion aki nos a haci mas.

E acuerdo durante e Reunion di Mita Aña, entre e periodistanan Colombiano y Ecuatoriano, ta un reaccion pa cu e storia aki cu a costa bida di nos coleganan, ta documenta y conoci pa tur. SIP a ricibi un comunicacion di e director di El Comercio, Carlos Mantilla, gradiciendo e muestra di apoyo y solidaridad ricibi di parti di e participantenan di e Reunion di Mita Aña. Nos ta tuma na conocimento di e saludonan di nos compañero. E atake contra prensa y periodistanan ta continua y esaki ta keda como evidencia den e informenan riba e libertad di expresion di e diferente paisnan di America cu a presenta na e reunion aki.

Desde e ultimo Asamblea General na Utah, 14 periodista a haya nan morto; cuater Mexicano; tres Ecuatoriano; dos Brasileño; dos Guatemalteco; Un Colombiano; Un Hondureño y un periodista Salvadoreño. Tambe tin un periodista Haitiano desapareci. Na Mexico a desplasa 11 periodista den e pais, pa preveni atentado en contra di nan bida.

Medionan di comunicacion, nan doño y periodistanan ta victimanan constante di intimidacion, acusacion, acoso, insulto, atakenan fisico y agresion di tur tipo di parti di e personahenan ey kendenan ta cuestiona y e gobernantenan na kende ta exigi rendicion di cuenta.

Na Cuba, e represion estatal ta aumentando. Atakenan ya no solamente ta en contra di periodistanan y nan integridad fisico, sino cu ta invadi nan vivienda y ta prohibinan salida di nan ciudad y den ocasion for di e pais, simplemente pa eherce periodismo. Ademas, e gobierno ta blokia websitenan nacional y internacional, mescos cu adressnan di email, relaciona cu derechonan humano y periodismo, nan ta spiona y hack rednan social.

Honduras y Nicaragua tin iniciativnan legislativo cu ta busca pa regula rednan social y internet, alegando criterionan altruista como prevension di violencia y noticianan falso.

Ta repititivo den varios pais di e region e uzo di plataformanan digital pa ataca, acosa, deningra y menasa periodista y medionan di comunicacion.

E sostenibilidad economico di medionan di comunicacion tambe ta un gran preocupacion debi na e retonan cu e industria ta enfrenta ante e era digital. E situacion ta bira pio den algun pais unda cu ta uza publicidad estatal como un herment di presion of castigo na e liñanan editorial di e medionan.

Na Venezuela, durante e ultimo seis lunanan, nuebe corant a stop di publica pa falta di papel. Un total di 46 radio emisora y tres stacion di television tambe a stop di funciona pa temanan economico, den hopi caso agrava pa e asfixia gubernamental. Di su parti na Bolivia, ta obliga medionan di comunicacion na difundi di manera gratuito campañanan di gobierno. Pa algun medio, esaki ta representa te hasta e 30% di su espacio publicitario.

Otro tema alarmante ta e denegacion di un husticia pronto, ekitativo y imparcial. Investigacion y procesonan hudicial pa e asesinato di periodistanan ta tuma tempo excesivo y den hopi caso, nunca ta yega na un sentencia definitivo en contra di e autornan.

Na Venezuela, e Poder Hudicial a yega na no reconoce e derecho na e ehercicio di periodismo y no ta castiga e responsabelnan di actonan violento en contra di medio y periodistanan. Ta uza tribunalnan militar pa encarcela civil, hasta periodista y reporteronan ciudadano. E procesonan aki ta plaga di desinformacion, abuso, aislamento y desconocimento publico.

Intento di varios Gobierno pa censura publicacion di noticia y impedi e difusion di berdad, cada biaha ta mas fuerte y den e ocasio aki, ta inclui den paisnan manera Costa Rica, Peru y Brasil. Ainda ta existi paisnan manera Panama unda cu ta castiga cu prison e delito di calumnia ora cu ta comete esaki atrabes di medionan di comunicacion. Esaki ta representa demandanan civil miyonario na medionan di comunicacion cu den hopi ocasion ta pone na riesgo e sostenibilidad di empresanan di comunicacion.