Magali Brito: Sindicatonan ta sinti cu gobierno ta falta nan respet

E sindicatonan hunto lo por logra pa cosnan cana tiki mas nechi. Tin decisionnan cu gobierno ta tuma, caminda cu por sinti cu toch sindicatonan mester por tin un rol mas participativo den esaki.

ADV

Magali Brito, Secretaria General di SEPPA, a splica cu tin un grupo di sindicato cu ta forma SUA. Riba e plataforma aki por bisa cu ta discuti toch basta problema cu ta surgi entre e sindicatonan, ultimamente tabata e discusion, na unda cada un ta trece dilanti kico nan a bin ta haciendo desde cu tin un gobierno nobo y e acercamento cu por tabata tin y si e ta yega na solucionnan si of no.

Un di e puntonan cu por mira cu ta resalta hopi, ta e trato cu diferente sindicatonan ta haya na mesa. Ta cataloga como un falta di respet enorme cu nan ta sinti y esey a termina den un carta cu a wordo manda, pidiendo e minister presidente atencion, dunando oportunidad na cada un di e sindicatonan cu a firma e carta ey, e oportunidad pa por splica con nan experiencia ta na mesa como sindicato, tratando di resolve problema di trahadonan, den cada un di nan sector.

Na e mesun momento con nan ta persibi e trato for di e gobierno mes. Riba esey tabata tin intercambio. Tin di compronde for di otro sindicatonan cu ta purbando pa papia cu e prome minister, pa sa ki dia e reunion eynan ta tuma luga. Recientemente ta haya informacion cu ya ta wardando awor aki na minister di labor, pa na momento cu e ta na Aruba, ta yama e reunion aki, pa clarifica un ke otro.

Keda cu e sentimento aki di falta di respet, di no ta wordo trata como un partner igual na mesa, ta un sentimento totalmente diferente ta locual cu sindicatonan ta experencia. Obviamente kier mehora esaki den e gobierno aki. Esaki tambe ta den cuadro di e discusionnan cu lo bay inicia den dialogo social riba e tripartite, riba asuntonan di labor, hunto cu e minister di labor, y cambionan di nos leynan laboral.

E sindicatonan a haya net e oportunidad pa expresa con kier pa sindicatonan participa den un ambiente di trabao asina aki y un ambiente di maltrato, di no ta wordo respeta. Den hopi di nan tin kehonan riba hefenan cu lo basico ta wordo nenga cu ta un bvvd pa por atende reunionnan. E ora eynan, con e gobierno actual y con e minister di labor ta premira e rol den sindicato den e discusionnan aki, si e instrumento basico pa nan por participa mes, qua ta oranan liber of bvvd, cu ta regla y cu no ta wordo consedi na e representante di sindicatonan. No sa ki dia e reunion lo tuma luga, pero ta spera esey lo ta pronto, pa por continua den discusionnan cu dunadonan di trabao, cu gobierno, den comisionnan, tin un falta di respet pa e participacion di e sindicato.

Atencion

Brito a comenta cu awor aki ta hopi importante pa por repasa riba e cambio di leynan laboral cu a tuma luga na 2013. Tin diferente cos cu despues di tanto aña ta mira kico ta su consecuencianan, su efectonan. Y e ta bon pa como sindicato por haya e oportunidad pa trece nan padilanti y mira con por trece cambio na esakinan. Tin hopi di e cambionan ey cu SEPPA no tabata di acuerdo cu nan, pero mayoria ta dicidi y a dal bay cu nan.

Di un otro banda, con e participacion di e sindicatonan ta bay ta riba tur ambito laboral, mester wordo regla.

Manera cu Brito a indica, tin sindicatonan ta haya problema mes pa haya dianan liber of oranan liber pa por atende asuntonan di sindicato. Esaki ta primordial pa e funcionamento di sindicatonan.

Asina mes tambe por mira cu tin hopi asunto cu ta bilateral. Ta asina cu ta e sindicato, cu e minister concerni tin cu hiba e discusionnan, pa yega na solucion. Riba e tereno bilateral, tin hopi sindicato ta indica di ta enfrenta problemanan cu nan dunado di trabao directamente of den e otro sindicatonan cu e Hoofd van Dienstnan of nan ta haya problema cu no tin encuentronan satisfactorio cu hasta e ministernan.

Na final, ta mira cu ta e solucion cu e trahado ta rekeri pa por funciona miho, e sindicatonan no ta haya. Ta hopi eroneo di hefe of mandatarionan e momento cu nan ta nenga participacion di un of otro sindicato, no ta e organisacion bo ta nenga, pero ta e grupo cu e ta representa ta keda sin haya solucion pa e problemanan cu nan tin na pia di trabao. Mester tin e conciencia di esaki, e ora pa partidonan por funciona miho, segun Brito.

Comments

comments