Sindicato y gremionan priva a reuni cu Gobierno awe den oranan di mainta. Tabata visibel cu sindicatonan tabata esnan mas rabia cu e posicion tuma door di Hulanda pa loke ta e condicionnan pa presta Aruba placa.
E balans di banda di e gremionan priva tabata mustra mas di comprension pa e demandanan di Hulanda, aunke si ta di acuerdo cu e forma di actua ey no ta uno elegante. Tur partido tabata di acuerdo cu e reunion / cumbre tabata uno informativo, ya cu no tabatin documento presenta pa nan por tin un bista mas profundo di e condicionnan di Hulanda pa duna luz berde pa e siguiente tranche di prestamo.
Hecho ta cu e condicion principal di un entidad nobo cu no solamente ta bay controla con ta uza e placa presta, manera a bisa na inicio, pero ta bay dicidi riba maneho di finanza, ta un sumpiña den wowo di principalmente e sindicatonan. “Nos ta compronde cu ora di presta placa, ta pone condicion, pero ta haya si cu mester duna tempo pa negosha y kisas yega na un miho acuerdo,” e ldier sindical Magaly Brito (SEPPA) a bisa na salida di e encuentro aki. Aunke, el a agrega, tur cos ta mustra cu Aruba lo perde su autonomia ya cu si bay di acuerdo cu e condicion, e lo caba cu e libertad cu e pais tin pa dicidi riba su mes.
Pensamento similar por a scucha di sindicalistanan cu a papia di falta di respet, pero cu ta compronde cu e situacion awor ta debi na mal maneho. Pero ta papia tambe cu no ta mira mucho otro opcion pa Aruba. Lidernan di sector priva sinembargo ta papia bon cla cu mester pone emocion y orguyo un banda, papia riba e hechonan y wak e situacion den forma realistico. Loke si tur ta di acuerdo cu ne ta cu nan a scucha tur loke cu Gobierno tabatin di bisa, pero cu no por tuma un posicion, debi na falta di informacion combina cu e hecho cu nan no por dicidi riba nan mes, ya cu mester consulta cu nan miembronan.
