Maduro den e carta ta bisa cu den cualkier momento cu Gobierno tin pensa di mishi cu posicion huridico di un empleado publico, esaki mester sosode den consulta cu sindicatonan. “Nos como sindicatonan responsabel ta consciente di e situacion cu Aruba ta pasando aden y lo keda pendiente pa cualkier novedad cu ta regarda nos miembronan y nos Pais en general,” e vocero di e sindicatonan a bisa.
Tabata siman pasa durante tratamento di presupuesto 2020 cu Prome Minister a bisa cu sector priva a duna di su banda caba y awo ta toca turno na sector gubernamental pa haci e sacrificionan necesario. “Tur hende mester sacrifica,” e mandatario a bisa na mas di un ocasion. Inmediatamente despues di esey, Minister di Enseñansa, aparentemente riba su mes, a dicidi di manda un carta pa sindicato di maestronan SIMAR unda a anuncia medidanan cu e ta tuma di inmediato, entre otro pa loke ta pago di overtime, losse uren, y tur otro tipo di trabou cu maestronan ta haci, inclusive di reemplasa un docente malo of esnan cu ta bay cas “buiten bezwaar”.
El a menciona den e carta cu na inicio di 2019 a papia di algun medida pa maneha e gastonan salarial di docentenan, pero cu no a wordo implementa of no completo. Asina a menciona tambe cu klasnan mester ta minimo 28 persona. SIMAR a reacciona sumamente disgusta cu e decision unilateral pa cual a dicidi di manda un carta y Prome Minister a bisa cu loke su colega Lampe a manda no tin validez. Ya cu mester sinta na mesa cu tur sindicato pa yega na un solo acuerdo riba diferente tema.