Sindicatonan a keha Ministernan di falta di respet

Ayera a tuma luga un reunion entre Union Sindica Aruba (USA) y Gobierno, representa pa Minister Presidente Evelyn Wever-Croes y Minister di Labor y Asuntonan Social, Glenbert Croes. Meta di e reunion tabata pa sindicatonan expresa nan malcontento y disgusto pa e forma con Gobierno ta trata e gremio sindical. A manda un mensahe cla na Gobierno, cu si no bin un cambio drastico den nan forma di comunica cu e gremio sindical, cu e problemanan y disgusto lo sigui escala. USA tin speransa cu Minister Presidente a compronde e urgencia di e peticion y cu lo trata nan disgusto cu e prioridad necesario.

Union Sindical di Aruba (USA) ta consisti di e sindicatonan FTA (General), SIWA (Trahadonan di WEB), SIMAR (Educadonan), UEA (Trahadonan di Elmar), STT (Trahadonan di Setar), UPA (Trahadonan riba waf), SPA (Polisnan), SADA (Duaneronan), SEPPA (General), ABV (Trahadonan di Hospital y IMSan) y ALVAST (Managernan na Elmar). Mester menciona cu e dos sindicatonan SPA y ALVAST no tabata presente durante e reunion cu Gobierno. Ta bon pa señala cu e sindicato STA di Diego de Cuba, actual coordinador di Minister Glenbert Croes, no ta miembro di USA.

Un total di 7 sindicato a manda un carta pa Prome Minister Evelyn Wever-Croes dia 21 di december ultimo, pidiendo un reunion URGENTE pa atende un lista di preocupacion bibando bou di e gremio sindical, entre otro e falta di contesta carta y responde riba urgencianan sindical. Desde 21 di december, a dura dos luna pa e sindicatonan por a sinta na mesa cu Gobierno.

Den e carta e sindicatonan ta referi na un falta di respet contra e gremio sindical. Den esey a mustra e prome mandatario riba un cantidad di biaha cu Gobierno ta cancela of pospone reunionnan cu e sindicatonan, despues di a warda simannan largo pa un contesta of reaccion.

A referi na casonan specifico, manera ta e problema cu a presenta entre directiva di sindicato SADA cu directiva di Cuerp di Aduana y Minister Xiomara Ruiz. Tambe e problema entre sindicato ABV y gerencia di Dr. Horacio E. Oduber Hospitaal, den cual hasta e Director di Cuido di Hospital, Ezzard Cilié, a menasa di kita e Presidente y Vice Presidente di ABV for di trabou.

E sindicatonan den tur e casonan ariba menciona, a manda carta pa Gobierno solicitando intermediacion, pero no ta haya ni sikiera un contesta, corda reunion. Den e caso di SADA, e situacion a bay asina leu cu e propio Minister Presidente mester a bula aden.

“Nos ta carga speransa cu lo bin un cambio den actitud di Gobierno. Pero e mensahe ta hopi cla pa nan. Si no tin cambio e problemanan ta bira mas grandi”, asina Hubert Dirksz di Sindicato FTA a bisa despues di e reunion, cu el a considera di a bay den bon ambiente y di comprension mutuo.