Sindicato STA: Trahadonan no kier mira miembro di ‘management team’ mas na Serlimar

Dialuna atardi a tuma luga un reunion entre sindicato STA kende ta representa un grupo di trahado na Serlimar y cu Minister Ursell Arends. E mandatario a invita e sindicatonan cu ta representa e trahadonan di Serlimar, esta SEPPA y STA p’un reunion na Cocolishi. Debi na compromiso, representante di SEPPA no por tabata presente n’e reunion.

E reunion tabata mas bien pa informa e sindicatonan cu pronto e minister hunto cu gerencia lo reuni cu e trahadonan pa informa nan riba e retonan di e compania pero tambe con ta premira pa sanea e situacion financiero di e compania.

Diego de Cuba ta presidente di sindicato STA, durante un entrevista cu 24ora.com el a conta mas di e reunion y tambe un situacion di gerencia caminda cu e trahadonan no kier mir’e mas eyden. A hasta firma un carta como muestra di malcontento den e compania contra e maneho y manera di atende cu hende di parti un miembro di management team.