Diabierna ultimo, sindicato SEPPA, cu ta representa un grupo grandi di personal di Guarda nos Costa, a tene un audiencia cu Minister Andin Bikker. Ta trata aki di un follow up meeting, riba e tres puntonan cu a palabra entre Minister y e sindicato.
Segun Edmundo Marlin di SEPPA, den esey tabata tin cosnan adicional cu a bin den e palabracion aki cu e Minister, cual ta e infrastructura di Dakota y tambe diferente otro kehonan. E follow up meeting tabata tin cun’e ta cu e Minister a laga DOW haci un analisis riba e problemanan di infrastructura di HvB. Tambe despues di a haci un analisis, a bin cu un quotation pa mira cuanto e costonan lo sali.
Banda di esey, Marlin a splica cu ademas di e parti di persona cu mester bin pa atende asuntonan personal di e trahadonan di Guarda nos Costa, e mandatario a bisa cu e ta bezig ta buscando un persona. El a papia cu un caba y e ta bay papia cu un otro, djey pa mira ken e lo bay pone.
Fuera di esey SEPPA a trece diferente keho cu a bin acerca. Entre otro leiding lo a baha e dianan di vakantie di e trahadonan cu ta traha continu dienst. Den regla ta bisa cu esnan cu ta trahando dagdienst normal, tin e cantidad di dianan cu ta perscribi pa ley. Pero na momento cu bo ta bay traha warda, ta halabo di e grupo ey y ta haya tres dia extra.
Por ehempel un hende cu tin 19 dia den un schaal 6, cu ta trahando dagdienst normal, ta haya 19 dia. Pero un hende cu tin schaal 6, trahando warda, ta nifica cu e ta haya 3 dia extra, cu ta bira 22. Eynan e kehonan a drenta cerca e trahadonan, cu leiding a baha nan vakantie. SEPPA ta pidi Minister pa atende cu leiding riba esaki.
Un di e otro problemanan cu tin, ta entrega laat di rooster. Tin un regla cu ta stipula cu e luna cu ta bin, mester haya e rooster, dos siman delanta y no loke a pasa ultimo biaha, cu dia 31 di juli, e hendenan a haya nan rooster pa augustus, cu no por.
Tambe a papia di e entregamento di overtimebonnan, cu ta conta pa algun trahado, ta entrega nan laat. Minister a bisa cu e ta bay atende riba e puntonan aki adicional y e parti di quickscan, den e dianan aki DRH lo atende cu Guarda nos Costa, pasobra DRH tabata bezig ta rondaf e formatieboek di KIA pa entrega na Minister, cu a sosode siman pasa. Aworaki, cu e tiki hendenan cu nan tin, nan ta purba toch di bay traha riba e quickscan den e dianan cu ta bin. Esey ta e palabracionnan despues di e follow up cu tabata tin cu Minister.
Mara na tempo
Marlin a splica cu nan kier pa e palabracionnan aki tuma luga mas lihe posibel. Entre otro e persona cu ta bay atende cu personal, segun e Minister ta bezig. No por djis busca ken cu ta y pone na e puesto. E parti di e quickscan, ta algo cu ta bay tuma un tempo, basta cu e trahadonan mira movecion, cu nan sa cu nan preocupacionnan ta atendi debidamente, e sindicalista a menciona.
