Sindicato di Duana a saca un comunicado den cual nan ta reacciona riba un carta di director di e instituto aki, cu ta papia di pone “lager kader personeel” na disposicion di e instituto. E carta di e director Ricky Croes no a cay den bon tera y ta algo cu e sindicato lo bay atende cun’e di inmediato.
“Nos a keda asombra y babuca cu kier pone “lager kader personael” na disposiciondi KIA,” e Presidente di SADA Edward Maduro a bisa den un declaracion.
SADA ta desaproba esaki totalmente mirando cu aworaki ta net e momento husto pa e personal di Duana haci trabou di control di costa. Si manda hende na disposicion di KIA ta neglishando bo mesun dienst y tarea. SADA ta haya cu awor mas cu nunca mester reactiva kustsurveillance p’asina duna un man y aporta nap ais Aruba cu ta pasando den un momento di crisis nunca antes bisto.
Na mesun momento e ta denuncia cu nan miembronan den rango administrativo no a wordo trata ultimo temponan aki. “Pero awo si nos ta bon pa expone nos miembronan pa un trabou cu nan no a huramenta p’e ni tampoco tin e preparacion debido p’e. Un spoedcursus no ta yuda si algo mester pasa.”
Ta informa nan miembronan cu niun hende, ni e director por obliga un miembro di Duana pa bay na disposicion di otro dienst. Esaki por sosode solamente a base boluntario, SADA su directiva a dicidi unanimamente cu nan no ta para responsabel pa miembronan cu bay boluntariamente na disposicion di KIA dado caso cu algo pasa na pia di trabou.
E director den un carta manda via email ta papia di pone un parti di personal na disposicion di KIA, a cambio di un compensacion cu mester discuti ainda riba dje. Y cu e hendenan aki mester pasa un curso. E grupo aki lo no bay traha directamente cu presonan.
