Sindicato SADA a bay parlamento. Aki nan a combersa cu fraccion di AVP y di MEP durante dia. E reunion aki ta pa informa nan riba e situacion di parlamento. Eduard Maduro, presidente di SADA, a splica cu esaki ta pa nan haya un bista di e situacion.
Diahuebs tabata tin e kortgeding caminda cu hues no a toest nada di loke nan a bin ta trece e ultimo dianan aki. E unico cos cu e toets tabata pa e parti huridico cu e coleganan no lo bay atras den salario, cual esey nunca no tabata e discusion tampoco.
Maduro a sigui splica cu ta mira cu nan por logra hopi, manteniendo e warda cu a bin ta señala cu no kier pa wordo elimina. Nan a haya ta necesario, mirando cu parlamento ta e organo mas halto di nos pais, lo ta bon toch pa nan tambe tin un bista duidelijk. Si bo no ta scucha of nan no ta mira e parti cu SADA ta trece dilanti den un contexto mas profundo, e ora nan no ta haya sa precies kico nan ta bezig cun’e. E ora a dicidi pa duna nan un splicacion completo di loke ta e situacion di e sindicato y tambe di loke nan a bin ta haci.
Manera cu a informa durante rueda di prensa, e besparing cu e minister a referi na dje, no ta realistico, pasobra e cifranan cu a haya cu e chef di aeropuerto mes a señala, a base di tur esakinan, no ta realistico. No ta cuestion di ta malcria. E douaneronan ta haci nan trabao manera nan ta huramenta pa haci’e. Maduro ta kere cu nan no por laga un set back chikito manera diahuebs preocupa nan. Nan no ta bay tira e serbete den ring, nan ta sigui bay p’adilanti y ta busca e manera pa por yega y pa tur hende por compronde kico ta e intension di e sindicato.
E intension di e sindicato ta sincero y legitimo. Nan no tin ningun otro aspecto su tras. Locual cu a bin ta papia tur e dianan aki, SADA ta keda para pa esey. E sindicato ta keda positivo, apesar cu e coleganan a keda hopi demotiva riba tur loke a bin ta sosode den e dianan aki, vooral e trato cu a ricibi di e mandatario. Pero SADA ta keda bay dilanti cu su miembronan y keda positivo. Nan ta keda optimista y cu si wak bon, e meta di loke nan kier logra pa loke ta siguridad di nos pais, nan lo yega unda nan tin cu yega algun dia.
Mas oido
Segun Eduard Maduro, fraccion di MEP kier haya un bista duidelijk di loke ta pasando. Nan a habri nan mes, nan a scucha, a haci preguntanan cu segun Maduro ta preguntanan al caso, pa haya un miho bista di loke ta e punto di bista di e sindicato. Esey tambe a sosode cu e fraccion di AVP. Dialuna lo bay tin un reunion mas unda cu lo trece esaki dilanti na e fraccion di POR. E preguntanan al caso cu a wordo haci pa loke ta e discusion cu tin andando, nan a haya un splicacion hopi amplio di esaki. Lo keda usa y busca tur e recursonan pa por logra sali for di e impasse aki. No obstante di e decision di diahuebs di hues, concepto di SADA, ainda nan ta den e impasse. E abogado di gobierno pa nan e ta un capitulo cera, pero pa SADA e no ta asina. E ta gewoon un capitulo di e buki.
