Sindicato no ta bay bandona lucha pa elimina 12.6%

Manera por a tuma nota, aña a habri cu desacuerdo y sentimento di preocupacion bou di e sindicatonan como tambe e trahadonan publico. Esaki relaciona cu e recorte di 12.5% den salario di e trahadonan publico, di cual nan a bin ta pidi pa algun luna caba pa elimina esaki. Sinembargo, despues di tantisimo esfuerso, protesta y peticion, gobierno ta keda para ariba cu e recorte aki ta un exigencia di parti di Hulanda pa brinda sosten di likides na Aruba.

Den cuadro di esaki, e sindicatonan SADA, SIMAR, SEPPA, SPA y FTA a opta pa bolbe dirigi un carta na gobierno splicando un biaha mas cu nan no ta di acuerdo cu esaki, pidiendo un relato por escrito di efectividad di e reduccion di e salario dje trahadonan publico, cualificando e recorte aki como sancion desproporcional y inhusto y alavez anunciando cu entrante prome di februari, e trahadonan publico lo bay traha 2 dia menos pa luna.

Reaccionando riba esaki, gobierno a manda bisa cu nan ta dispuesto pa considera e ahuste di cantidad di ora di trabou aki, pero a invita nan un biaha mas pa manda tres representante sindical pa un reunion cu e comision financiero dialuna dia 10 di januari proximo.

Impasse di recorte di 12.6% ta sigui: Sindicato SADA SIMAR SEPPA SPA Y FTA cu mensahe cla y raspa na gobierno.

Impasse di recorte di 12.6% ta sigui: Sindicato SADA SIMAR SEPPA SPA Y FTA cu mensahe cla y raspa na gobierno.

Posted by 24ora on Friday, January 7, 2022

Asina den un rueda di prensa extraordinario, e sindicatonan SADA, SIMAR, SEPPA, SPA y FTA, representa pa Edward Maduro, presidente di SADA, a expresa cu nan a manda un otro carta pa gobierno y ta spera cu enberdad esaki bira e ultimo carta pa loke ta e situacion aki. Pues, ta prefera sinta cu gobierno y tur sindicato pa dialoga riba esaki. 

Maduro a bisa cu, basa riba e ponencianan den e cartanan, gobierno no ta sincero ni cu e sindicatonan, ni e trahadonan y ni cu pueblo. A referi aki na e hecho cu minister presidente a bisa den rueda di prensa cu e recorte aki tabata algo negosha cu e sindicatonan siendo cu esaki no ta berdad. Segun Maduro, dia 17 di april 2020 a introduci e recorte aki di forma unilateral y na ultimo ora gobierno a yama e sindicatonan y informa nan di dicho recorte, pues na ningun momento tabatin dialogo ni negociacion. A pidi esaki si, pero gobierno no a duna espacio pa esaki y a impone un caso di “take or take it”, pues no tabatin otro opcion.

Den tur esaki, Maduro a enfatisa cu nan no a desvia di nan lucha, referiendo aki na cu gobierno a bisa cu nan a desvia y ‘settle’ pa e 12.6% y pasa over pa menos dia di trabou. Segun Maduro, eliminacion di e recorte aki ta y lo keda locual nan ta para p’e y cu na ningun momento a bisa cu ta bay laga e lucha aki un banda.

Pa cobertura mas amplio lesa edicion di TREMPAN mañan.