Recientemente Gobierno a introduci un ‘Prestatiemanagement-systeem’ cual ta ancra den e decreto nacional AB2022 no.165. Un decreto cual e sindicatonan, TOPA, FTA, SPA, SIMAR, SADA y SEPPA no ta di acuerdo cu ne.
Esaki ta motibo tambe pa cual e sindicatonan a manda un carta pa Gobierno unda cu ta exigi Gobierno pa sinta na mesa cu e sindicatonan p’asina sigui delibera riba un ‘PM-systeem’ adecua cu lo conta cu e aprobacion di tur sindicato y di gobierno.
Den un comunicado manda pa tanto nan miembronan como tambe e no-miembronan, nan ta informa cu tanten cu no anula e decreto aki, nan ta conseha tur empleado pubico pa ora cu yena e formulario aki, corda skirbi abou:
1. ‘onder voorbehoud van alle rechten’ of
2. ‘bou presion’ of
3. ‘manteniendo tur mi derechonan’.
Na final di dicho comunicado, nan ta pidi tur miembro- y no miembro, pa keda pendiente pa un conferencia di prensa diabierna awo, den cual lo duna mas informacion.
Mester menciona cu e sindicatonan tin algun siman caba ta expresa nan preocupacion riba e sistema aki. Na december 2022 e sindicatonan SADA, SEPPA, TOPA, SPA, SIMAR a reuni cu DRH, pa demostra nan preocupacion relaciona cu introduccion di e “Prestatie Management”. Ta trata aki di un sistema di evaluacion di trahado cu Gobierno a introduci entrante prome di januari 2023.
E sindicatonan a lamenta cu e idea aki ta biba cerca Gabinete Wever-Croes II for di algun tempo caba. Parce cu a incluye como parti di e Landspakket cu Minister Presidente a negocia cu Hulanda. Di un banda e sindicatonan ta di acuerdo cu lo mester introduci un sorto di sistema asina, pero di otro banda tin algun punto di diferencia. De facto, nan no ta sinti cu nan diferencianan ta mucho leu for di otro. Pero, sindicatonan no a haya bon cu minister-president a hisa benta y pusha e cambio di ley desde januari caba.
E sindicatonan a manda un carta tanto pa S.E. Gobernador Alfonso Boekhoudt como pa minister-president, mr. Evelyn Wever-Croes, unda a señala nan preocupacion. Durante tur e tempo aki, desde cu a cuminsa cu e dialogo riba e tema aki, a señala cu tin hopi punto cardinal, cu tin di haber cu e parti di evaluacion. Manera cu e ta awo, ta mustra cu e evaluacion ta conta solamente pa e homber chikito, pero no pa esunnan den e puestonan di liderazgo. Tin hopi cos cu lo introduci, pa loke t’e ambtenaarnan, pero p’e hefenan di departamento y e directornan, no tin nada.
E sindicatonan a kere sigur cu e fecha di prome di januari 2023, no lo tabata factibel. Tin hopi punto cu mester discuti ainda na mesa. Tin hopi punto cu mester discuti na mesa ainda, sea cu Gobierno of e representantenan di Gobierno.
