Awe mainta den un conferencia di prensa organisa p’e sindicatonan SIMAR, SEPPA y SADA, a informa cu e unidad di e sindicatonan, cu ta keda para pa nan miembronan, a dicidi cu e “marcha di luto” plania pa diamars dia 24 di mei pa 3:00 pm ta bay sigui segun schedule.
Presidente di sindicato SADA, Edward Maduro, a bisa cu como sindicato preocupa cu e situacion den su totalidad a dicidi di yama e marcha aki p’asina mustra “e malcontento, e tristesa cu ta bibando bou di…e miembronan directo di e sindicato y tur hende cu un di un of otro manera tabata afecta.” A señala cu esaki lo bira un marcha di pueblo pa mustra e tristesa di tur locual ta pasando riba nos isla.
Asina a haci un yamada na un y tur cu ta sinti su mes yama considerando e situacion cu nos ta pasando aden pa yega diamars awo dia 24 di mei pa 3:00 pm na ex-DOW caminda lo reuni y asina ranca sali cu e marcha pasivo direccion Bestuurskantoor.
Maduro a indica cu e situacion ta uno mucho mas amplio cu solamente e ambtenaar y e sindicato, sino uno cu ta bay mucho mas leu y ta p’esey ta referi na henter pueblo di Aruba. Maduro a indica tambe cu nos tin un gobierno cu ta propaganda cu e hende ta central, pero cu no ta mira esaki den practica.
Pa un relato mas amplio, lesa edicion di TREMPAN.