Sindicato FTA den su trabou diario ta atende keho di miembronan cu di un manera of otro ta sinti cu no ta ricibi e trato husto of mereci na nan trabou. Miembronan kier sinti nan mes sigur cu tin un sindicato cu ta sali na nan defensa na momento cu presenta situacionnan na pia di trabou. Esey por lo menos ta un di e motibonan dicon Sindicato FTA ta esun mas grandi na Aruba, pasobra nan tin e ekipo, e hendenan y e experiencia con pa atende cu e kehonan aki. Mayoria otro sindicato ta un “one man sow”, mientras cu FTA tin su mesun edificio, su oficina y un personal atento pa ofrece sosten y apoyo na tur miembro.
Hubert Dirks ta Presidente di Sindicato FTA y ta contento con e sindicato ta evoluconando den un organisacion mas moderno, eficiente y cu hopi contacto directo cu miembronan. Otro siman dianan 8 y 9 di mei lo tuma luga nan prome congreso extra ordinario. Ey lo repasa tur locual a sosode caba y loke mester bin ainda den e aña aki, cu sosten y apoyo di nan miembronan. E congreso ta e organo mas halto di e sindicato y ta eynan mayoria decision importante ta cay, cu despues e directiva mester ehecuta den e temponan nos dilanti.
Separa di e kehonan cu e sindicato ta atende diariamente, tambe nan ta negociando varios contracto colectivo di trabou na e mas di 50 companianan afilia na e sindicato. Siendo e sindicato mas grandi, cu ta celebra 55 aña di existencia na juli proximo, nan tin un departamento dedica na negocia contractnan colectivo. E ekipo ey ta gosa di hopi conocemento legal, experiencia y cu hopi CAO como ehempel caba pa por adapta si ta necesario. Nan ta capas pa reuni cu gerencia di e compania, revisa cifranan y na final sali cu un CAO cu ta cumbini e compania y e trahadonan.
Separa di atende keho y negocia CAO, e sindicato ta canando un proceso di modernisacion, for di nan imagen, te na e maneho diario, incuyendo e trayecto costoso pero importante di digitalisacion pa promove mas eficiecia den nan trabaonan di tur dia. Esaki na final mester traduci su mes den mas y miho servicio na e miembronan.
Te cu awor, durate negosacionnan, no a tpa cu problemanan di indole grandi cu a rekeri accion of protesta. Mayoria di e retonan a conoce un solucion na mesa mes, cu ta cumbini e trahadonan y e companianan tambe. Si Hubert Dirks ta kere cu den caso cu no yega na solucion, si dialogo no por yuda, e ora accion ta e ultimo recurso.
Na final Sindicato FTA tey pa lucha pa e clase trahado, pa mehora nan calidad di bida y logra progreso den nan carera di trabou. Pa esey e sindicato ta na mesa constantemente cu otro partnernan, manera entre otro Gobierno, pa sinta den dialogonan social y reunionan tripartidario, den un esfuerso pa garantisa bienestar di tur trahado, tanto e miembronan di FTA como tambe e trahadonan engeneral.
Na final, Sindicato FTA ta desea tur trahado un feliz dia di trabou. Di acuerdo cu Hubert Dirks, awe ta un dia pa reflexiona dicon ta importante pa ta parti di un sindicato y e importancia di sa bo derecho y debernan na trabou. Den esaki no mester permiti abuso na trabou, sino mas bien trata pa avansa pa logra un miho calidad di bida conhuntamente.
