Sindicato di Polis di Aruba (SPA), por medio di su presidente Jose Dirksz ta exigi pa e website di noticia www.masnoticia.com, rectifica e articulo publica dia 21 di october ultimo cu e topico “Forma di procede di polisnan riba video ta incorecto”.
Den dicho articulo ta tilda cu Polisnan ta ricibi placa a cambio di duna informacion of tips di loke ta sosodiendo pa cierto medio di prensa por haya privilegionan manera entre otro di ta prome na e sitio den caso di inval di Arrestatie Team. Den otro palabra, ta acusa Cuerpo Policial di Aruba di corupcion. “Nos, di Sindicato di Polis di Aruba no ta acepta e tipo di acusacionnan aki den media, sin cu tin base. Dicho expresionnan sin base, ta atacha e integridad, bon nomber y imagen di Cuerpo Policial di Aruba”, asina Jose Dirksz a skirbi den un carta cu el a dirigi na e website encabesa pa Norben Giel y Raymond “Baboe” Hoek.
Mas leu el a bisa “Nos, di Sindicato di Polis di Aruba, ta duna e website www.masnoticia.com te cu dia 26 october 2018, pa rectifica publicamente e acusacionnan haci, den e articulo publica riba dia 21 di october 2018, por medio di e website www.masnoticia.com. Si en caso esaki no sucede, Sindicato di Polis di Aruba lo tuma pasonan contra e website cu ta haci nan mes culpabel di Articulo 2:223 lid 2 di e buki penal di Aruba (Wetboek van Strafrecht van Aruba)”.
Tabata hopi cla cu e media en cuestion, dor di no tabata na altura di e noticia andando y no a cubri’e, a tilda cu Polisnan lo a yama 24ora.com pa suministra informacion. Obviamente, contando cu periodistanan cu hopi aña di experiencia, tin contactonan cu dificilmente e hobennan cu awor ta drentando e ramo aki por conta cune.
Den e caso specifico aki, Polisnan ta hopi disgusta cu e media aki, pasobra ta tilda nan di corupcion y ta atacha nan nomber. E Polisnan disgusta ta lamenta cu net e grupo aki, cu ta masha cerca di e Minister di Husticia y di un Vocero di Polis, awor ta sali ataca e mesun Polisnan. Pa colmo, Minister a duna nan oido y a opta pa berdad yama Mando Policial pa investiga e asunto aki, siendo cu no ta berdad. Ta un hilaridad pa mira net e medianan cu no ta busca noticia riba caya, manera nos ta haci 24 ora pa dia, ta e prome nan pa tilda Polisnan awor di ta corupto.
Headlines Group, cas editorial di 24ora.com ta enfatisa bon cla: Ningun Gobierno, ni Orden di Abogadonan y pio Minister di Husticia lo por influencia nos maneho editorial. Esaki ta atacha e libertad di prensa cu mester sigui biba den e democracia bibo cu nos ta biba aden. Ta sinti cu awor cu Andin Bikker ta Minister, e kier purba censura media, siendo cu tempo e tabata den oposicion, el a uza e mesun noticianan aki for di media pa critica e mandatario na mando e tempo ey. Mester tene masha cuidao cu atacha e derechonan awe cu Bo ta Minister, pasobra ta e mesun derechonan ey lo Bo mester conta cu nan bek mañan ora Bo no ta na poder mas!
