Presidente di Sindicato di Polis (SPA), Jose Dirksz, a reuni cu Gobernador Alfonso Boekhoudt. Un di e preocupacionnan di mas grandi ta e cortamento den salario di polis. Ta preocupacion cu SPA a vocifera duidelijk na Gobernador cu ta algo cu nan no ta bay acepta mas. Na momento cu gobierno insisti cu ta bay corta den salario di polis pasobra no tin placa, lo nifica cu polis lo “walkout”. E situacion ta birando di mas!
Diferencianan entre Gobierno di Aruba y Hulanda ta un asunto netamente riba nivel politico y no tin nada di haber cu polis. Si acaso pa motibo di diferencianan politico ta pone cu polis ta bira victima, esaki lo tin su consecuencianan.
Polis durante pandemia a sigura di tene nan mes na protocolnan implementa pero asina mes tin cu corda cu polis ta keda un “frontliner” den e crisis aki cu contacto directo cu pueblo cu ta pone nan diariamente den risico di contagio.
Na e momentonan aki tin mas cu 20 polis contagia cu covid-19
E cifra aki ta algo cu Dirks ta premira di bay subi hopi mas cu ta bin cu e trabou cu nan ta eherce como e prome den liña como frontliners. Ta remarca tambe riba e hecho cu a priminti polisnan un “frontliners toelage” cu rond mundo ta algo cu nan ta honra, esaki a keda te na promesa.
Dirksz ta opina cu si gobierno no tin pensa di honra e promesa aki, por lo menos e por optimalisa e siguridad na e wardanan cu te ainda algun medida no ta na vigor pasobra supuestamente no tin placa cual ta haci e riesgo di contagio na demas coleganan mas grandi ainda. Consecuencia di e situacion aki ta cu cada rato tin cu cera wardanan di polis.
Pa locual ta e situacion di TDQ cu ta valido ainda riba nos isla, e approach cu polisnan ta hiba ta uno hopi mas cauteloso cu e prome biaha, ta den un “second wave” y como tal ta tene cuenta cu contagio ta mas halto y ta tene nan mes na un distancia y ta atende cu mas precaucion y asina evita di trece e virus aki na nan propio hogar.
Pa finalisa Jose Dirksz (SPA) ta enfatisa cu e mensahe riba cortamento den salario ta super cla, nan no ta acept’e. Na momento cu gobierno bin cu e locura di corta den salario di polis, polis ta “walkout”. Un yamada tambe ta bay na comunidad pa tene un poco pashenshi cu nan como polis, nan tambe ta hende nan ta, ta traha optimalmente y cu hopi amor pa e trabou, ban purba di evita mas brote di e virus aki. Comunidad por tuma nota di mas persona cu ta fayece y esey ta duna un bista di cu e sector medico no por carga cu e presion mas. Preveni ta e solucion den e caso aki awor akinan.
