Despues di a ricibi un mocion di desconfiansa, e directiva actual di Sindicato di Polis Aruba (SPA) a dicidi di convoca un reunion general pa tur su miembronan riba dia 9 di april 2018 pa 10:00am na Club POVA na Santa Cruz.
E puntonan riba agenda ta:
- Adaptacion di e Statutonan di SPA
- Protocol entre SPA y Minister Andin Bikker (POR)
- Fecha pa presentacion di APFA relaciona cu areglo di pensioen
- Crea un comision di caha pa revisa e cifranan anual di SPA
- Mocion emiti dor di Omar de Kort durante reunion di 20 di februari 2018
Durante e reunion aki, e actual Presidente di SPA, Edgar Maduro lo mester midi su popularidad ainda den e miembronan di e sindicato, pa sa si e ta keda na cabes of mayoria lo aproba e mocion cu ta exigi su retiro y di su directiva. Parce cu e ambiente den Polis ta dividi entre e mas hobennan y esunnan cu mas aña den e Cuerpo. Ta premira cu lo sigui un campaña feros awor entre e dos forsanan den Polis, pa mira ken lo keda of tuma timon di e sindicato over.
Un cos si, e hecho cu un cantidad a presenta luna pasa pa exigi cabes di e directiva ta debi cu ta sinti un relacion mucho “pega” entre sindicato y e Gobierno actual, di cual POR ta maneha e cartera di husticia.
