Sin helm y core pa Polis = Detencion

Diasabra mainta, despues di e parada di “Jouvert Morning” na San Nicolas, a tuma luga varios control den trafico. Na diferente luganan strategico, Polis a controla pa garantisa cu trafico ta bay abou trankilo. Dado momento a topa cu un brommer di cual e chauffeur y ocupante tabata sin helm. A duna instruccion pa para, pero e chauffeur a sigui core bay.

A start un persecucion di e unidad motorisa di Polis y un poco mas pabou, na altura di rotonde Pos Chikito a para e motorcycle.

Polis a atende cu e chauffeur, a detene na e sitio mes y a laga e pasahero, un mucha muhe cu rolls den cabey, a keda na pia pendiente lift pa cas.

Ta importante pa motociclistanan ta consciente pa bisti helm ora ta core un motorcycle. Tambe ta importante pa sigui instruccion di Polis y asina evita keda na pia durante eventonan carnavalesco.