Cluster 4 a informa di a sinta cu e directiva di scol y nan mes a dicidi di habri scol normal, y pa cual tabata tin diferencia di fecha. SIMAR ta contento di tende cu ta bay duna maestronan di enseñansa flexibilidad y espacio. Ta compronde cu enseñansa tin cu sigui y no por pone cos plat, pero mester bay na un manera responsabel.
Josephine Albertus, presidente di SIMAR a bisa: “Na tur momento mester sigura of garantisa e siguridad y salud di maestronan.” Nan mes no por dicidi, pero loke minister di enseñansa a bisa ta crisis ta dicidi. A sinta cu e directiva di scol y nan mes a dicidi pa esaki. SIMAR ta spera cu e directiva di scol sinta cu e veld prome cu scol habri, pasobra e docente ta esun cu ta para dilanti klas. Como cu e docente sa kico ta kico na scol, e ta esun cu por bisa di garantisa siguridad, bienestar y salud di muchanan y di su mes den local.
Enseñansa tin di sigui y economia tin di sigui draai. Responsabilidad ta esun di mas importante, pasobra si bin un brote lo mustra dede riba esun responsabel. Nan ta realistico, pasobra e cantidad di persona contagia ta subi, di cual tin docente nan. SIMAR ta contento di loke e mandatario a bisa cu si e docente ta cay den e grupo vulnerabel p’e bisa, asina ey conhuntamente cu directiva di scol por yega na un otro solucion.
Hopi scol ta kita docente cu ta invalster y esey tambe ta un problema, pasobra con ta haci si un docente tin Covid y no por ta na scol. E pregunta ta con pa soluciona esaki. SIMAR a haya hopi yamada di docentenan cu tabata invalster y a bisa nan cu e aña escolar nobo no tin invalster.
Desde biaha pasa tin e protocol, pero e ta responsabilidad di cada mayor pa tene nan yiu na cas si e mucha ta malo of hasta si tin hende na cas cu Covid, nan mester yama avisa cu e alumno ta malo. E responsabilidad ta di mayor pero unabes mucha bin scol bek, e responsabilidad ta di e docente cu tin e mucha den klas. Si e maestro no ta sinti sigur of no por garantisa siguridad, bienestar y salud pa nan vocifera esaki. E sindicato no kier tende despues cu e docentenan no a volg e protocol bon.
