Maestronan den oranan di atardi a marcha for di DOW te na sede di Gobierno unda cu a haci entrega di un documento cu peticion den dje.
Mirando tur loke a bin ta tumando luga y pa garantisa un bon maneho den ramo di enseñansa, ta bisa cu a purba dialoga cu e mandatario Lampe, pero no a logra. E no ta honra loke cu tin preto riba blanco. SIMAR kier trankilidad den enseñansa di Aruba.
Presidente di SIMAR Josephine Albertus a bisa cu tin hopi desconfiansa y disgusto. Ni carta di Minister Presidente ta wordo respeta. Kier un persona cu tin orea habri pa scucha esnan den e area di enseñansa. Prome Minister Evelyn Wever Croes di mainta a informa cu e no tabata na altura di e marcha aki pa cual e tin otro compromiso awe tardi y e lo laga un persona encarga tuma e carta, kende a resulta di ta Vice Prome Minister Andin Bikker.
Na final di e carta, ta menciona cu si e mandatario no tuma honor na su mes, ta pidi Prome Minister pa kita e cartera di enseñansa for di Rudy Lampe y duna un persona cu ta habri pa dialogo.
Despues di haci entrega di e carta na Gobierno, a cana bay Parlamento pa haci entrega di un copia. Den oranan di mainta a entrega un carta similar na oficina di Gobernador di Aruba.
Presidente di Parlamento Ady Thijsen a ricibi e carta y a priminti di lo pone atencion na preocapacion di e docentenan.
Hunto cu Presidente di Parlamento tabata presente diferente Parlamentario, tanto di coalicion como di oposicion.