Desde april, sindicatonan ta bezig riba e topico di indexering y diabierna, Sindicato di Polis Aruba (SPA) a dicidi cu nan ta bay tuma un accion, papia cu nan miembronan y SIMAR a bin pa sostene nan pasobra ta un lucha cu no solamente SPA tin, pero SIMAR y e otro sindicatonan tambe.
Ta pa e motibo aki, segun Josephine Martilia-Albertus, presidente di SIMAR, cu awo ta e comienso y pa e proximo simannan cu bin, e otro sindicatonan lo sigui. Nan kier mustra union, pasobra cu union ta yega hopi leu. For di comienso caba e sindicatonan tabata hunto y no ta pasobra awe SPA a bay papia cu su miembronan so nan tabatey. Aki SIMAR a mustra cu nan t’ey y ora cu SIMAR tin algo cu su miembronan riba e topico, SPA tambe por bin mustra e sosten y cana e caminda hunto.
Oido di gobierno
Segun Martilia-Albertus, lamentablemente tin cu bisa, for di april ta bezig y te awe ainda no a haya nada pa por dialoga riba dje. Nan kier pa gobierno bin cu su propuesta riba e 3.6% cu mester wordo paga di 2018. Nan kier sa si por duna un of dos porciento, pero bin cu algo bek. Pero te awe, no a tende nada di nan. Unico cu nan ta bisa ta pa duna nan tempo pa nan por sondea y wak kico ta kico. Algo concreto no tin. Ta bira tempo si pa bin cu algo concreto, segun Martilia-Albertus. Ta pa e motibo aki tin cu tuma paso. E miembronan tambe kier pa SIMAR bin cu un noticia pa nan y no por keda asina aki. Cada biaha nan ta bin bek den nan seno, pero no tin nada pa informa riba e asunto di indexering.
OAA
Por a ripara cu despues di manifestacion den e ultimo luna, no a bin mucho afo con esaki ta canando. Segun presidente di SIMAR, e manifestacion cu tabata tin den e luna cu a pasa, ta e grupo preocupa di docente cu a bin dilanti pa vocifera nan preocupacionnan. SIMAR a duna nan sosten, pero no por a uni, mirando cu SIMAR ta un sindicato di base. Den casonan asina semper tin cu bay bek den nan seno. Nan ta na altura tambe cu di Openbare Avondleergangen, cu no a bay completamente bon. Por a mira cu e docentenan di OAA a acerca minister y no tabata tin sindicato envolvi. A purba di wak con por a bin cu nan den un acuerdo hunto cu e minister. SIMAR ta contento si cu e docentenan ta para, mustra y vocifera nan disgusto. Pero tin cu corda si cu tin cu haci’e na un manera hopi strategico y ta algo cu tin cu sigui cun’e pa bay p’adilanti.
Por bisa si cu SIMAR ta bezig cu e docentenan, cu OAA y ta spera cu por bin cu algo fructifero y positivo pa e docentenan.
