SIMAR ta invita miembronan, mayornan y alumnonan pa manifestacion masal mañan

En conexion cu e reunion cu Conseho di Minister a yama cu sindicatonan, SIMAR a convoca su miembronan pa un manifestacion masal mañan diaranson. Lo topa pa 2:00pm na ex-edificio di DOW den Paardenbaaistraat pa hunto cana riba L.G. Smith Boulevard pa edificio di Conseho di Minister. Ey e sindicalistanan lo topa cu e Ministernan pa delibera riba nan posicion pa cu e reduccion di gastonan, den cual sin duda e miembronan lo sinti e efectonan.

Josephine Albertus di SIMAR a conta cu durante un reunion ayera nochi cu su miembronan, a haya e mandato pa sigui cu e lucha y accionnan. Nan no ta confia Minister Rudy Lampe mas, pio cu a sinta na mesa tanto biaha, ta yega na tanto acuerdo, pa despues e cambia e acuerdonan toch na su conviniencia. E sindicato ta acusa e Minister di ta manipula informacion den prensa, pa purba aparente comosifuera cu e sindicato no ta papia berdad.

E Presidente di SIMAR den reunion awe mainta na Scol Paso pa Futuro.

E decision y mandato di e miembronan tabata pa tene dos dia di accion, den forma di walk-out entre 7:30am y 9:30am na scolnan tur rond di nos isla. E scolnan publico a bay miho cu esunnan cu ta resorta bou di fundacionnan, pasobra eynan a aplica “no work – no pay” pa e docentenan, cu a limita nan di expresa nan mal contento y derecho liber di demostracion.

Di eynan a yega na e decision tambe pa mañan diaranson, yama un manifestacion masal cu lo sali for di ex-edificio di DOW den un marcha pa Bestuurskantoor. E intencion ta pa hunto compaña e sindicato pa e reunion cu Conseho di Minister. Ta solicita pa miembronan presenta na ex-DOW y ta invita mayornan tambe pa uni cu nan na e marcha. Den caso cu alumnonan tambe kier uni na e marcha, nan ta mas cu bonbini, segun Josephine Albertus, pasobra na final, e cambionan proponi pa Minister Rudy Lampe lo tin repercucion pa nan tambe como studiante.