SIMAR: Gobierno ta bezig ta regla pago di docentenan di Colegio San Nicolas per mandaat

Dialuna mainta Sindicato Simar a tene un reunion hunto cu prome minister Evelyn Wever-Croes riba e falta di pago di overtime di docentenan di Colegio San Nicolas.

Segun presidente di SIMAR, Josephine Albertus ta trata aki di oranan cu e docentenan a traha, no oranan extra. Den enseñansa no ta haya pago di 150% sino 100% y ta e oranan aki ta esnan cu e docentenan no a haya nan pago. Ta oranan cu si no cumpli cu nan, lo perhudica e alumnonan di Colegio San Nicolas. E oranan aki ta yuda e studiantenan cu e vak cu nan ta swak den dje.

Awo pa colmo a haya un menasa cu si nan no traha e oranan ey, nan lo no haya nan pago. Ta sinti cu e ta un sistema di intimidacion, mas ainda si mira cu otro scolnan tambe a haya carta cu si nan acudi na e reunion di SIMAR riba tema aki, lo no haya pago di e ora ey di trabou. Esaki ta algo cu no ta necesario, segun presidente di SIMAR, pasobra no a invita nan pa e reunion.

Mientras tanto den oranan di atardi, a reuni cu minister di Enseñansa, dr. Rudy Lampe, kende ta bezig ta regla e pago per mandaat pa e maestronan, pero e mester di aprobacion di prome minister y tambe minister di finansas.

Segun Albertus, ta buscando nomber di e docentenan cu no a haya nan pago pa asina geef door, pa asina bay over na pagamento cu aprobacion. 24ora.com lo keda pendiente pa e desaroyonan rond di e caso aki.