Docentenan di SPO a pidi Nora Eleonora di DPS pa bin p’asina nan mustr’e nan preocupacion cu nan tin encuanto e edificio nobo.Segun Josephine Martilia-Albertus, presidente di Simar, e edificio ta recien construi sinembargo tin basta defecto.
E docentenan den e praktijklokaal mester corta palo den airco sin un zuiger. E splinternan di palo ta bin den aire den nan pulmon y esey no ta bon pa salud.Mirando cu nan ta traha cu palo den un espacio chikito, esaki ta surpasa 96 decibel. Esaki a wordo midi sin alumno den klas. E desordo lo subi riba 100 decibel unabes cu tin e alumnonan den klas.
SIMAR: Edificio di SPO Brazil tin varios defecto
SIMAR: Edificio di SPO Brazil tin varios defecto. Click link pa mas https://24ora.tv/2WYHmde
Posted by 24ora on Friday, June 21, 2019
Den charts, cientificamente esey no ta bon, pasobra riba 100 decibel, per direct bo ta haya daño na e odio y esey no ta bon. Si wak den cushina, unda cu nan ta duna practica, un caminda tin un leak di e rioolering. E docentenan tin cu duna les den un holo masha malo mes. Esey tampoco pa loke ta hygiena ta bon. Pasobra ta bezig ta traha cu cuminda den un holo di riool. Nan no tin gymzaal tampoco. Door cu e docentenan a wordo bisa pa nan ta creativo, nan tin un berging y den e berging a bisa cu nan kier purba duna gym. Pero e berging ta hopi chikito. E berging no tin un afzuigsysteem, esta aire fresco. Si bo tin cu bay hinca 12, of manera e Minister a bisa 14 pa 15 mucha den un espacio asina chikito, tampoco pa loke ta salud no ta responsabel. Si bo mira tambe e localnan di teoria y practica, unda e docentenan tin cu duna nan lesnan, ta hopi chikito. Di baina e muchanan por move, corda e docente pa move den e local.
Berguensa
Segun Martilia-Albertus, no a sinta cu nan pa loke ta e edificio. A haci algo apart y a djis bin y bisa e docentenan cu nan tin cu bin den e edificio nobo. Ora cu Martilia-Albertus cana rond den e edificio y mira tur e defectonan, el a hay’e hopi deplorabel y tambe hopi berguensa cu ta pidi pa docente traha den un situacion asina.
Tin mas cos
Dia 10 di Juni ultimo, ora cu e Minister a sinta cu e docentenan na SPO, Minister a pidi pa dos siman, te dia 21 di Juni, pa dun’e tempo pa e bin cu un respuesta riba e pregunta di e docentenan. E prome pregunta tabata di e docentenan ta cu si e “merge” di e dos scolnan lo sigui. Esta si SPO Santa Cruz y SPO Savaneta lo tin cu bin hunto. Den e carta e contesta cu nan a haya ta cu otro aña escolar, esta esun cu ta bin, tur e alumnonan di prome aña lo bay SPO Brazil. Na SPO Santa Cruz, 2de y 3de klas lo keda. E ta un comienso di un merge di un scol, otro aña y e aña despues. SPO Santa Cruz lo bira menos y finalmente lo keda cu un solo edificio, cual ta SPO Brazil.
Riba e di dos pregunta unda cu a puntra pa e curriculum. A bisa cu e curriculum cu ta cla riba un nivel macro. Awo e docentenan mester bay traha riba e curriculum microniveau. Otro aña escolar nan lo haya trabao pasobra nan tin cu bay drecha e curriculum pa nan por duna les riba microniveau. Riba nan di tres pregunta na Minister, riba e vacature, mirando cu e director di Santa Cruz no lo tey otro aña, a wordo bisa cu no lo bay tin un vacatura, pasobra cu no lo tin un director otro aña na SPO Santa Cruz. Director di SPO Brazil lo ta director di tur dos scol.
Cantidad di alumno
E docentenan a sinta y delibera y ta yega na 173 alumno pa otro aña. E edificio ta traha pa 145 alumno. Nan lo tin cu bay draai les di calidad cu mas mucha cu e edificio por wanta.
Ambiente di e reunion
E docentenan a sinta y a duna nan opinion. Nan a scucha y en realidad nan mester tempo awor aki pa laga e informacion bezink y loke nan por a bisa. Otro siman lo tende di nan. Simar ta haya jammer pasobra e Minister ta pone den e carta cu e localidad ta uno bon. Pero canando rond den e luga y si mira tur e defectonan, e no lo ta responsabel pa otro aña pone tanto alumno den un edificio cu supuestamente ta nobo y cu tin tanto mankement. E no ta bon pa salud tampoco, ni di e docente, ni di e alumnonan, Josephine Martilita-Albertus a finalisa bisando.
