E lucha di e docentenan y sindicato SIMAR pa haya participacion y dialogo cu Gobierno y Minister den asunto di Enseñansa ta sigui. Un delegacion di SIMAR a participa den un reunion cu e comision di enseñansa di Parlamento.
Loke sigur e presidente di SIMAR Josephine Albertus por a bisa ta cu e encuentro tabata den un ambiente amenos y nan a haya chens pa expresa nan disgusto y disgusto di e maestronan. Tur loke cu a wordo papia cu e veld di enseñansa. “Nos por a duna mas claridad con e veld ta mira e situacion. Nos ta contento pa scucha di Parlamento cu a expresa cu mester sinta na mesa y dialoga. Nos ta di acuerdo cu esaki, pero SIMAR ta haya cu no mester dialoga solamente riba implementacion di decisionnan tuma. Tambe mester analisa si e decisionnan tuma tabata esunnan mas apropia.”
E reunion tabata uno hopi largo, unda cu a haci hopi pregunta. Di e forma aki por a duna claridad di loke ta pasando den enseñansa. Y por a bisa of demostra cu no tabatin envolvimento di maestronan, kende ta esnan cu sa loke ta realisticamente posibel.
A pidi Gobierno chens pa mira con por evita di kita e 5% di e bezoldiging y yega na mesun resultado cu Gobierno ta desea pa loke ta menos gasto. Gobierno a bisa si cu e “tot nader orde” nan no por haci nada cu ne, pasobra no ta nan a bini cu esey. A pidi pa mira e cifranan pa mira si por yega na otro decision. Awor nan ta sperando riba e documentonan for di Departamento di Recurso Humano. “Nos ta hopi contento di por haya e chens pa dialoga y yega na un solucion.”
