Docentenan di scol Paso pa Futuro a acerca sindicatonan SIMAR y SEPPA pa atende un biaha mas cu e topico di mudamento di scol. Sindicato SIMAR tabata asombra cu un biaha mas esaki a bin dilanti, un topico cu a discuti na juni.
Josephine Albertus, presidente di SIMAR, a bisa di ricibi un carta, verificacion y a kere cu e topico aki a cera. Un biaha mas Minister di Enseñansa kier cambia loke el a bisa y pone por escrito. Na juni e sindicatonan a cana y splica amplio pakico e scol no por bay den otro edificio.
Na luna di juni docentenan di scol Paso pa Futuro a lucha intensivamente y cu stress. Hunto cu e cabesante anterior, a lucha pa salvaguardia edificio di e scol cu ta adapta pa brinda enseñansa na muchanan special, asina Bela Cabral de Andrade, docente di Paso pa Futuro a bisa. Dia 24 di juli a logra haya contesta oficial via carta di Minister di Enseñansa cu e scol lo no muda pa otro localidad.
Despues di vakantie e cabesante actual a trece un punto preocupante pa nan cu “Nora“ di DPS a pidi pa sacrifica nan sala di reunion y presta esaki na un klas di kleuter. Nan a manda un carta dia 28 di augustus cu diferente punto pakico esey no ta posibel, pero no a haya un oido. Segun Cabral de Andrade, a trece mueblenan pero Brandweer mes a bisa cu e edificio ta afgekeurd. A topa cu otro obstaculo y a informa nan cu na december mester muda pa SPO. E docentenan no kier esaki, p’esey nan tin diferente pregunta y kier un contesta na e cambionan aki.
Un biaha mas e mandatario ta bisa cu nan tin di sali y esaki ta un falta di respet. A splica cu si nan keda den e edificio actual, por garantisa un enseñansa di calidad. Kier sa kico tur tin den e localidad aki y awo tin di sali unda cu ta baha e calidad di enseñansa. Esaki ta algo cu no por. Na juni e stress tabata halto caba door di e situacionnan cu ta pasando na e momentonan aki, tur esaki a trece un peso riba e maestronan.
