Siman nobo lo ta hopi crucial pa sindicatonan den gobierno pa loke ta indexering

Diabierna e bloke sindical di trahadonan di gobierno a tene un reunion cu gobierno. Pero nan no a keda nada contento. Despues di a tene diferente sesion y informando comunidad, reunion cu nan miembronan, finalmente nan tabata pendiente pa gobierno duna nan un splicacion of un contesta riba e cartanan cu nan tambe a haya relaciona cu indexering.

Tur cos a mustra cu e reunion aki no tabata uno bon pa e sindicatonan. Nan no a sali contento, manera ya indica. Nan a sali hopi disgusta. E informacion eynan nan lo hiba pa nan miembronan.

Siman nobo lo ta crucial pa Empleadonan Publico: Bloke sindical a sali disgusta for di reunion cu Gobierno riba indexering

Posted by 24ora on Saturday, October 26, 2019

Aparentemente gobierno lo a bisa nan cu probablemente no tin indexering, pero si nan kier nan por papia si na aña 2025. E siman cu ta bin sigur lo habri cayente pa e sindicatonan entre otro Aduana, di maestronan y di e restonan di e sector publico.

Segun presidente di SADA y vocero di e bloke sindical, Edward Maduro a comenta cu dos siman pasa diabierna, ora cu SIMAR tabata tin su reunion extraordinario, a haya un carta cu un invitacion pa un reunion diabierna ultimo, pa duna un presentacion di nan propuesta, pa loke ta indexering, cual a bin ta buscando pa casi 7 pa 8 luna caba.

A bin haya e prome proposicion di gobierno y sindicatonan. Dialuna awo lo bay tin un reunion sumamente importante den seno di e sindicatonan pa asina dicidi y wak con lo sigui atende cu e asunto aki. Mucho informacion pa loke ta e proposicion mes no lo duna ainda, pasobra e sindicatonan ta bezig ta informando nan miembronan y no kier bay den mucho detaye prome cu informa e miembronan. Posiblemente pa dialuna ya caba tur sindicato lo mester por a haci esaki y e ora lo bay tin mas detaye.

Si mester bisa cu esaki a bini despues di casi 7 pa 8 luna cu ta pidiendo gobierno pa un contra proposicion. For di prome dia a bisa cu nan punto di salida ta e 3.6% pa loke ta e cifranan di inflacion di CBS pa 2018. Tambe por a scucha gobierno ta papia di e cap cu a firma den e protocol na 2018 cu Hulanda di e gastonan di personal cu no mag surpasa 479 miyon. Aki por bisa cu lamentablemente gobierno a admiti esey den e reunionnan, cu no a tene cuenta cu e parti di indexering ora a firma e protocol na 2018. E acuerdo bilateral cu a firma na 2014 ta bisa explicitamente den dje cu entrante 1 di januari 2019 lo bay indexeer dado caso cu tin inflacion den 2018. Gobierno na mas di un ocasion a bisa cu nan no tin espacio teniendo cuenta cu e cap di 479 miyon. Pero esaki ta debi cu gobierno mes no a tene cuenta cu locual el a firma. Gobierno a firma na 2014 y nan mes no a tene cuenta cu esaki.

E ora logicamente esey a pone cu gobierno no tin espacio manera cu nan a indica varios biaha den nan presupuesto of maneho pa loke ta indexering. Pero si tin cu bisa cu ta haciendo evaluacionnan pa loke ta e proposicion cu a haya diabierna y sigur dialuna sindicatonan ta bay reuni merdia pa asina por analisa y bin cu puntonan di bista pa loke ta trata e proposicion cu a haya diabierna.

Contra proposicion di gobierno

Maduro a sigui splica cu aunke ta prematuro pa bisa cu a sali disgusta, si nan no a spera loke gobierno a bin cun’e. Despues di 7 pa 8 luna sin un contra proposicion di gobierno, tabata tin pensamento si cu loke gobierno lo kier bin cun’e, no ta mucho alentador. Si tin cu bisa cu tin puntonan cu ya caba no ta mucho di acuerdo cun’e. Ora ta papia di indexering, ta pasobra e aña anterior tabata tin inflacion. Esta mester negosha pa por haya algun compensacion bek y no por bay sinta warda añanan largo pa por haya un tipo di compensacion.

Den pasado a yega di vries indexering. Si no tin hera na 2001 of 2002 a pidi pa vries indexering pa algun aña, cu a conduci na e accion di 2008. Ta spera cu no por yega asina leu. Ya caba tin cu bisa cu den e carta di e proposicion di gobierno, nan a propone pa sinta aki dos siman, pa sigui papia. Di biaha na mesa a bisa cu e sindicatonan no ta kere pa warda dos siman ta na su luga. Gobierno na e momento ey a bisa cu si ta cla pa e siman aki caba, pa notifica nan pa sinta.

Sindicatonan ta kere cu dialuna caba lo manda bisa gobierno cu kier sinta di biaha. Ya caba tin un idea di e direccion cu nan kier bay. No mester warda dos siman prome cu sinta. Dialuna lo confirma si lo sinta e siman aki si of no.

Man bashi

E sindicatonan ta basa riba e acuerdo di 2014. Nan ta pone duidelijk pa bin cu un comision pa trata indexering desde 2019. Kico a sosode ta cu nunca e comision aki a wordo forma pa gobierno, nan no sa. E aña aki a bisa gobierno cu e sindicatonan kier trata e asunto di indexering 2019, awor aki sin forma un comision y un comision mester bin pa trata indexering 2020, bay p’adilanti, dado caso si tin inflacion.

Si no tin inflacion, bo no por bay pidi gobierno un tipo di compensacion. Tin dos asunto di indexering riba mesa cu ta indexering 2019 y pa futuro. E comision ta pa futuro. Si gobierno no kier toca e tema pa tur e añanan aki, e ora tin cu wak con pa atende esaki. Si ya caba a palabra cu ta bay atende indexering 2019, desde un forma no den comision y un comision cu cual tambe ta en espera, mirando cu esaki mester ta regla via un MB, pero esaki no a form’e. Eynan tin cu bay haya un clarificacion riba dje. Si ta bisa cu e comision of cierto temanan lo papia te aki par di aña, e ora e comision no bal la pena awor aki. Esey tambe ta cosnan cu tin cu bay pidi clarificacion di parti di gobierno.

Proposicion di gobierno

Gobierno a duna un proposicion. Awo ta turno di e sindicatonan pa bay analis’e, bay profundisa den dje y bin cu un contra proposicion bek riba dje. Si ta algo cu por acepta no ta un problema. Ta cla pa firma ayera mes na manera di bisa. Pero una bes cu ta wak cu loke e punto di salida di e sindicato ta y ta desvia basta for di dje, logicamente tin cu bay bin cu un otro contra proposicion. Esey ta parti di negociacion. Semper bo ta haya un partido ta bin cu algo y e otro ta bin cu e otro. Eynan ta caminda e sindicatonan y gobierno ta awor aki. Ta turno di sindicatonan pa bin cu algo cu loke gobierno a propone.