Siguridad y responsabilidad ta cuminsa na cada un di nos

Si mira bon, e cantidad di polis cu tin, compara cu e hendenan cu ta bay actividad, nan ta tiki. Tin miles di hende cu ta bay un actividad. Por ta un actividad cu tin 1000 hende ta burachi, e chens di wordo gara, no ta grandi segun Alex Pieters di Polis Motoriza. Hopi hende ta keda purba. Esunnan cu a wordo gara, tin cu sufri e consecuencia.

No haci’e pa polis

No ta asina cu tin hou aan mas tanto hende posibel. E intencion no ta pa cumpli cu trafico djis pa cumpli cu ley di polis. Polis tey pa haci un control, pa cos no bay for di man. Pero e hendenan tin cu sali cu e pensamento cu e siguridad y responsabilidad ta cuminsa na cada un di nos. No haci’e pasobra no ta mira polis den e bario, por ehempel pasa den luz cora. Haci’e pa bo mesun siguridad pasobra bo no sa si algo riba ruta por cambia y bo por haya bo mes den accidente. E ora full bo bida y di otro por cambia. Asina hendenan mira brommer bin, nan ta lucha pa bisti safetybelt y cuminsa core rustig. Hacie pa bo ta mas safe riba caminda. Aña pasa por bisa cu e cantidad record tabata 2 accidente fatal. Kier pusha e aña aki yeg’e na cero. Por a mantene casi 5 luna sin un accidente fatal y nos por masha bon. Si djis baha velocidad y cumpli cu ley, bo por ta safe riba caminda. E ora bo no mester worry. Nos tur por sali cu un pensamento cu nos por yega safe cualkier caminda.

Accidente ta keda sosode

Segun Pieters, e autonan cu no tin seguro ta wordo kita. E problema ta cu e control ta hopi dificil. Manera cu tin pa number, ta yama central ta haya direct resultado. Pa keuringskaart tambe, ora cu contact DTI. Pero pa seguro tin cu contact tur e instancianan di seguro. No ta un procedura facil. E ta tarda un tiki prome cu e proces verbaal yega, no ta algo cu ta bay lihe y esey tambe ta stroba pa duna e proces verbaalnan pa seguro. Te ora cu haya nan den accidente y despues ta haya cu tin cu paga e gastonan di e accidente y e proces verbaal, e ora nan ta sinti’e. Berdad e accidentenan no ta bay stop. Si a mira cu e accidentenan pisa a cuminsa baha. Esey ta un bon señal segun Pieters. December a mira cu tabata tin hopi na fin di aña. Awor aki toch por mira cu den e parti nobo tin accidente ta sosode. Rotondenan ta haya, riba Green Corridor tambe ta sosode. Por mira cu situacionnan cu a bin nobo, cu hendenan ta lubida. Ora di cansancio of bao di influencia, nan ta bay switch over riba un autopilot, lubidando cu e situacion di trafico a cambia. E ora ta bin cu e issue cu nan ta subi rotonde, velocidad den cierto bochtnan. Esey na cuminsamento mester custuma cun’e. Despues di algun tempo, ora cu tur hende sa nan ruta vast, e cos ta bay drecha. Pero ainda no a keda cla. Falta algun parti ainda cu tin cu bay habri. Mientras cu e proyecto di Green Corridor ta bezig, tin cu enfoca riba esaki, pa e hendenan custuma y haci nan conciente di e cambionan y pa nan paga tino. Si bo ta coriendo riba un caminda cu ta prome biaha y no tin hopi ta core, djis baha bo velocidad un tiki. Pone bon atencion y paga tino riba trafico. Esey ta esun di mas importante.