Esaki ta un di e expresionnan cu nos por a scucha mayornan bisa despues di a atende lectura recientemente ofreci na mayornan cu ta desea di compronde nan yiunan miho.
Un lectura cu a wordo ofreci gratis pa Sra. Sharleen Tromp, Docente y Desaroyado di Identidad y Talento cu a tuma luga na Biblioteca Nacional na Oranjestad.
Sra. Calmera, kende ta un mama di un hoben studiante di 14 aña ta haya cu pa gran parti hobennan ta yega te na final di nan estudio na Aruba y ainda no ta sigur ki escogencia pa tuma referente e direccion di nan estudio.
“Na Aruba, hopi biaha nan ta warda te na final di nos hobennan nan estudio, unda nan mester bay tuma un desicion pa bay continua nan studio den exterior, pa core haci algun presentacion. E no mester ta te na ultimo, pa e ora nan cuestiona kico nan mester bay haci pero si nos cuminsa implementa e material cu Sra. Sharleen a duna for di onderbouw – scol basico – Aruba lo bay tin studiantenan hopi mas firme para den nan zapato y nan lo sa kico pa para p’e y ki desicion nan mester tuma,” Nainomie Calmera, mayor di hoben den di 6 grado na Ibero High School.
“E tipo di material aki ta yuda tur hende den e area di nan relacionnan. Sea como mama, ruman, yiu, esposa of colega. Tur direccion y den cua etapa di bida, e material aki ta yuda bo. Bo manera di pensa con pa trata cu otro hende, e ta yuda bo wak bida di un otro angulo.”
“E material a principalmente yuda mi yiu compronde ami como su mayor,” – Sra. Stella de Windt, mama di un hoben studiante (17) Havo 5, Colegio Arubano.
Sra de Windt ta bisa cu tipo di lecturanan aki ta oportunidadnan pa hobennan haya bon informacion, “Tempo di mi tempo no tabata tin e cursonan aki.” De Windt kende a opta pa atende e lectura hunto cu su yiu pa e hoben mes haya informacion a bisa, “Mi a bin cu mi yiu ya cu e ta den un un edad transitorio. Scuchando e material, mi yiu por a reconoce su mesun identidad, el a compronde e partinan cu e tabata tin duda riba nan y el a principalmente compronde ami como su mayor.”
“E ta te hasta yama mi na mi personalidad awo den cas, desde cu nos a atende e lectura. El a yuda mi yiu no solamente haya miho comprondemento na cas, pero tambe cu su amistadnan na scol. El a keda hopi motiva y a logra haya un otro bista pa cu otro nan caracter. E material ta duna bo un comprondemento cu bo por aplica.”
Segun Sra. Ghislaine Geerman, un ehecutivo profesional, “Companianan mester inverti den nan empleadonan pa tipo di entrenamento asina, cu ta enrekece desaroyo individual y comprondemento di conducta. Dicon cierto individuo ta manera nan ta, y cua funcion ta adecua pa nan di acuerdo nan personalidad.”
“E material a wordo presenta na un manera cu ta hopi facil pa compronde. A crea ehempelnan cu tur persona presente por a reconoce den nan bida diario. Sharleen a splica tur cos den detaye y el a comparti su mesun experiencia cu su personalidad. Sharleen tambe a duna e charla den un esfera di confiansa, cu esnan presente por comparti cosnan personal abiertamente cu ta yuda otronan relaciona cu nan mes.”
“E tabata un ‘eye opening moment’ pa mi, pa #1 reconoce bo mes, #2 siña compronde bo mes y #3 ta dispuesto pa yuda bo mes den locual cu bo kier mehora como persona.”
“E material tambe a haci mi curioso den estudio y futuro direccion profesional. Y mi ta desea profundisa mas den conoce mi personalidad pa mi sigui desaroya como persona y tambe conoce personalidad di otronan, pa compronde y tin miho relacionnan den futuro.”
