Diaranson ultimo dia 12 di juli pa 9:00pm a tuma luga e wega di futbol entre Merca y Martinique na Tampa, Florida den “Raymond James Stadium”. Mescos cu den fin di siman, e biaha aki atrobe CONCACAF a scoge Ing. Richard Dijkhoff, Presidente di AVB di Aruba pa ta e “Match Commissioner” hunto cu un referee, dos assistant referee y un “fourth official”. Esaki tabata di 10 wega di e “Gold Cup” cu a caba di inicia y lo termina dia 26 di juli proximo na Merca, unda paisnan afilia na CONCACAF ta participa.
Ta bon pa splica cu e rol di un “Match Commissioner” ta pa representa CONCACAF den forma oficial durante e wega. Den caso di cualkier incidente, e comision di CONCACAF lo tene cuenta cu e rapport di e “Match Commissioner” y di e referee. Pues ta un posicion masha importante durante e weganan pa clasificacion aki.
Cu esaki ta demostra un biaha mas e respet y admiracion grandi cu CONCACAF tin no solamente pa Arubaanse Voetbal Bond pero tambe pa su Presidente, esta Richard Dijkhoff.
E aña aki ta di 14 edicion CONCACAF Gold Cup di Norte, Centro America y di Caribe. Tambe e ta di 24 campeonato total di CONCACAF den e region. Un total di 12 ekipo ta participa durante e weganan cu ta tuma luga na 14 diferente stadion den Merca. E weganan a cuminsa dia 7 di juli y e wega final lo ta dia 26 di juli proximo y cu Merca como pais anfitrion.
A funda Arubaanse Voetbal Bond (AVB) na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.
