Algun individio den un taxi a tira un artefacto explosivo contra e centro di atencion inmediata di Polis di e bario Soledad 2.000 den oranan di marduga, hecho cu a laga shete persona herida, entre nan, cuater polis y un civil, segun El Heraldo.
CAI a keda cu daño na su front. Cinco ambulance di e clinica Vidacoop a atende cu e emergencia. Tres herido a wordo identifica pa autoridad como e agente di polis Bryan Redondo y e civilnan Jose Barraza y Luis Alfonso Florez Arboleda.
Tur a wordo hiba na e clinica Oriental. Otro dos herido mas a wordo hiba na e clinica La Victoria y Hospital Universidad del Norte.
Esaki ta e di dos atentado terorista cu a sosode na Barranquilla y su area metropolitano den menos di 24 ora.
E prome a sosode pa 6’or y 40 di mainta diasabra, na e Warda di Polis di e bario San Jose, hecho cu a laga cinco polis morto y 38 herido.
Na e luga, general Mariano Botero Coy, comandante di Polis Metropolitano di Barranquilla, a manifesta cu e di dos atake aki, parce a wordo prepara pa ehecuta hunto cu esun cu a sosode na e warda San Jose.
Dos version a keda forma riba e manera con nan a atenta contra CAI. E alto oficial a señala cu, aparentemente, e artefacto explosivo a wordo laga na e luga, mientras cu e habitantenan di e sector a indica cu esaki a wordo tira for di un taxi.
Botero Coy a laga sa cu un cel urbano di ELN lo ta tras di e hechonan cu a sosode entre diasabra y diadomingo.
