Diabierna y diamars tabatin tratamento di un caso basta pisa den Corte. Henter e tratamento a tuma luga via di Video-Conference pa motibo di Covid-19 y siguridad. Un di e detenidonan ta cera na KIA (e acusado Arubiano y e Venezolano (considera e sicario) ta cera na e prizon na Boneiro. A acusa nan di preparacion pa comete un homicidio y posesion di 4 arma di candela, incluyendo un mini-uzi.
E tratamento di caso a cuminsa for di diabierna cu esun di e homber Arubiano Marco Ephraim Tromp, kende tabata esun cu mester a yuda e sicario Venezolano Luis Armando Pineiro Ocando pa likida e homber Kevin Richardson. E motibo tras di e plan ta pasobra e homber ey a horta droga di un organisacion criminal y a menasa un persona cu un arma den un bar. Pero a descubri e duo aki den nan plannan prome cu a yega na e fase di ehecucion.
Autoridadnan tabata sigui e homber Pineiro Ocando, pa un caso di atraco arma, ora cu nan a scucha cierto combersacionnan den direccion di un likidacion. Esaki a pone cu nan a dicidi di actua mesora. E acusado mes ta bisa cu e tabatin contacto cu e persona (di Hulanda), cu kier a contrate, via di whattsapp pa mata un persona. Nan a bis’e cu pa e trabou e lo haya 10 mi florin. pero no a yega asina leu di acepta e trabou. “Nunca tabata mi intencion pa ehecuta ningun hende. E intencion tabata pa tuma e cen y despues huy direccion di Venezuela.”. P’esey defensa a bisa tambe cu no tin ningun prueba di e intencion di su banda.
Durante tratamento di e caso a bini dilanti tambe cu autoridadnan a haya nan mes obliga pa manda Pineiro Ocando pa e prizon na Boneiro pa motibo cu a trata di mate.
E hecho aki a sosode den luna di januari. Dia 17 di januari tabatin contacto entre e acusado y e persona na Hulanda. E mesun dia Polis a dicidi di detene, ya cu nan tabata siguie caba. A dicidi di detene y a haya chat cu Tromp tambe, di Madiki. En conexion cu un investigacion andando, Seccion Crimen Organisa di Cuerpo Policial a haci un entrada hudicial den un container situa patras di un percela na Arendsstraat. Den e container a detene e homber Marco Tromp y tambe e señora di inicialman C.R.G. Den e container a confisca un cantidad di cocaina, marihuana, 4 arma di candela di cual un di nan ta un mini UZI, placa y celular.
A pidi un castigo di 7 aña pa cada un y aki tres siman lo tin sentencia den e caso aki.
