Sharin Luydens awor na cabes di Universidad di Aruba

Recientemente a nombra mr. Sharin D. Luydens como Presidente di e Hunta di Supervision di Universidad di Aruba. Den e mundo di universidadnan ta yama e hunta aki “College van Curatoren”. Luydens ta tuma e encargo over for di mr. Juri Nicolaas, cu tabata Presidente di e colegio pero cu a dicidi pa tuma nan retiro “en bloc”. E hunta tabata consisti di Juri Nicolaas, Miriam Gonzalez, Dolfi Richardson, Jill de Cuba y Marielsa Arends.

Cu e cambio a tene cuenta cu un grupo di expertonan hoben, den funcionnan clave den comunidad, tur empleadonan publico, pa sigui controla y supervisa e trabounan den Universidad di Aruba.

College van Curatoren di Universidad di Aruba, nombra desde juli 2019

E colegio di coratornan nobo ta consisti di:

  • mr. Sharin Luydens, Director di Censo y Registro Civil (DBSB)
  • mr. Herry Koolman, Director di Centraal Bureau voor de Statistiek (CBS)
  • mr. Angelo Brete, Director di Meldpunt Ongebruikelijke Transacties (MOT)
  • mr. Haime Croes, Director di Departamento di Infrastructura y Planificacion (DIP)
Mr. Sharin Luydens a cuminsa su carera den Gobierno como Polis. Hopi lihe el a sinti cu esey no ta fin di su capacidadnan y competencia. El a opta pa sigui studia entre aña 2003 pa 2006 na Universidad di Aruba y a logra bira Hurista. na maart 2009 a nombr’e como Director di Censo y Registro Civil.

No tin ningun duda cu mr. Sharin Luydens a haci un cambio positivo den e departamento y publico mesora a nota un cambio pa miho den e calidad di servicio, actitud di trahadonan, eficiencia y sin lubida henter e proceso di digitalisacion di e departamento y su servicionan. Separa di su funcion na Censo, Sharin Luydens ta Secretario di Conseho Electoral, pa cual e tabata encarga cu organisacion y coordinacion di e ultimo eleccionnan Parlamentario riba nos isla.

Probablemente como cu e tabata ex studiante na Universidad y conoci pa su nivel halto di integridad y su ambicion na perfeccion, a scog’e como “Presiden Curator” na Universidad di Aruba, bou kende awor e Rector, mr. dr. Glenn Thodé ta raporta.

Minister Mito Croes (def) a funda Universidad di Aruba na aña 1988, cu solamente e facultado di ley. Na aña 1993, Universidad di Aruba a amplia su facultad cu esun di Accounting, Finansa y Mercadeo (FEF), cu entretanto ta e facultad mas grandi y cu mas studiante. Na aña 2005 a agrega e facultad di Hospitality and Tourism Management Studies (FHTMS). Na aña 2009 a agrega un otro facultad mas, esta Faculty of Arts and Science (FAS).

A introduci recientemente, den cooperacion y cu sosten di KU Leuven, a lansa e facultad di SISSTEM, cu ta para pa Sustainable Island Solutions through Science, Technology, Engineering and Mathematics. Y pa facilita studiantenan pa por drenta un programa di educacion avansa, a introduci e facultad di “Academic Foundation Year”. Ta trata aki di un programa di 1 aña den cual ta certifica e studiante via un programa pa ekip’e, motiv’e cu habilidadnan, hermentnan y capacidadnan pa logra un entrada exitoso den programanan di educacion avansa. De facto, a crea e facultad aki pa por sirbi como un brug entre educacion na nivel “High School” y esun Universitario.