Shailiny Tromp-Lee (MEP) ta felicita ganadonan di Arte di Palabra 2019

“Di curason mi ta felicita tur participante y ganadonan di e competencia literario escolar cu ya ta organisando pa 11 aña. Y di awor caba mi kier desea tur hoben cu ta bay representa Aruba na Corsou hopi exito”, asina miembro di Parlamento di e Fraccion di MEP, Shailiny Tromp-Lee, a duna di conoce awe.

Diasabra nochi na Cas di Cultura a tuma luga final di e tremendo proyecto literario y escolar “Arte di Palabra” (AdP) organisa pa Departamento di Cultura Aruba hunto cu Arte di Palabra Aruba.

Shailiny Tromp-Lee, miembro di Fraccion di MEP den Parlamento, den ultimo dos eleccionnan (2013 y 2017) a logra exactamente e mesun cantidad di voto riba su nomber, esta 573 voto.

A admira e talento di nos hobennan y scucha nan voz. Nan a transforma nan pensamento, sentimento y experencia di bida den diferente emocion y a laga nan alma papia mediante nan poesia presenta. “Pa mi semper tabata un placer y privilegio pa asisti na e competencia aki y por duna mi sosten y apoyo na e hobennan”, asina Parlamentario Shailiny Tromp-Lee a duna di conoce.

Ta considera AdP un tremendo plataforma pa hobennan por demostra nan potencial via declamacion cu sinceridad, poemanan y storianan cu ta relata na nan vision, deseo, sentimento, emocion, reclamo y anhelo cu asina tanto pasion. E experiencia cu ta adkiri ta di un balor asina importante y cu sigur lo aporta na desaroyo di tur e hobennan aki den nan bida. E experiencia ta amplia nan capacidad y ta duna nan balentia pa asumi cualkier reto y responsabilidad cu bida ta pone den nan man pa expresa sin miedo y libertad nan pensamento. Sin lubida cu nan aporte na nos coleccion literario cu nan poemanan ta uno hopi valioso.

“Mi ta felicita tur scol participante principalmente e maestronan encarga cu e preparacion di e hobennan y cu ta motornan grandi tras di cada exito di nos hobennan. Tambe na tur e mayornan comprometi cu nan tarea di educa y stimula nos hobennan pa nan sigi realisa y desaroya nan talento, asina Shailiny Tromp-Lee, miembro di Fraccion di MEP den Parlamento, a bisa.

E proyecto aki tin balor emocional pa e Parlamentario, pasobra e ta corda cu el a cuminsa bou auspicio di su tata, ex Minister di Cultura Ramon Lee.

Comments

comments