Shailiny Tromp-Lee (MEP): Recuperacion di turismo ta e fruto di un bon maneho

Dialuna 1 di augustus 2022  Minister di Turismo y Salud Publico Dangui Oduber a trata den un rueda di prensa e cifranan di turismo pa loke ta trata 2022 te cu awor. Alabes Parlamento ta haya mensualmente e cifranan for di AHATA. E cifranan di e ultimo lunanan ta mustra un recupercion fuerte. Ta trata cifranan cu ta duna un bista cuanto bishitante a yega nos isla den un luna. Pa loke ta trata nos airport nos ta mira crecemento consecutivo di cantidad di bishitante compara cu e aña record di 2019. Cifra di 2022 ta surpasando e cifranan di aña 2019, esaki sigur pa e tres lunanan tras di lomba. 

Cifra ta mustra cu den luna di april di e aña aki a registra un recuperacion di nos turismo di 108% compara cu april 2019. Tambe ambos luna di mei y juni a registra e mesun cifra di recuperacion cu ta 103% compara cu respectivo luna den aña 2019. Pa e prome 6 lunanan di aña 2022 Aruba a ricibi 528.325 turista. Esaki ta un recuperacion di 92%! Aruba ta e di dos pais den mundo den recuperacion di turismo. Sigur esaki ta demostra cu nos ta un pais hopi resiliente. Un desaroyo sumamente positivo y hopi necesario pa nos pais y cu sigur ta brinda nos perspectiva hopi positivo. Asina nos pais por bin mas lihe bek riba pia, nos lo ta menos dependiente di Hulanda, e caha di Gobierno por recupera y yuda absorba consecuencia y desaroyo mundial negativo cu ta tumando luga manera impacto di e guera na Europa, prijs di crudo y scarsedad di producto.

Na mes momento e recuperacion aki tin un efecto positivo riba nos economia, caminda negoshi tambe ta bay recupera mas lihe, ta crea cupo di trabou  y ta brinda oportunidad na nos famianan den necesidad.

Mi ta convenci cu e recuperacion aki ta fruta di un bon maneho door di tur stakeholders den turismo, ta resultado di e decisionnan tuma cu curashi door di Gobierno y henter e crisis team y mas cu tur cos ta demostra e trabounan duro y excelente cu diariamente nos hendenan ta haci den e sector turistico. Turismo ta keda e driver di nos economia. Nos mester keda brinda nos bishitantenan e servicio di calidad y e experiencia di siguridad cu nos isla ta conoci p’e. Esaki ta trahando hunto so nos por sigui logr’e.