Ayera nos a trata e ley cu ta trata normacion di salario di topfunctionaris den sector publico y semi publico (Ley LNT). Durante reunion nos a tende diferente ponencia, critica y sigur hopi creacion di panico.
Argumento a caba cu nan pasobra realidad ta cu nos tur den e sala di Parlamento sa cu e ley aki tabata na caminda y ta consciente cu di un manera of otro e ta necesario pa coregi desaroyonan salarial fo’i control cu a bin ta tumando luga pa hopi aña. Na mes momento nos mester reconoce e hecho cu na cierto momento e ley aki a bira un condicion di Hulanda pa Aruba por a haya sosten di likides cu tabata asina necesario, pa ta specifico den tranche 2. Un condicion stipula na un momento di necesidad hopi grandi di nos pais.
Algo cu hopi hende ta manera kier lubida of ta cumbininan saca diferente situacionnan for di contexto na convenencia propio of partidista.
Condicionnan di Hulanda
Nos no mester lubida cu nos situacion financiero, economico y di salud tabata grave y alarmante. No ta pornada nos mester a fia 904 miyon florin, un sosten cu no a bin bou di e capa di solidaridad, pero cu a bin cu un boshi condicionnan cu te dia di awe mi ta haya inacceptabel y no hustifica! Pero ki otro tabatin cu acepta nan? Pa cumpli cu e condicion pa loke ta trata e ley di LNT aki Gobierno di Aruba a institui e comision Corporate Governance Aruba pa aconsehanan al respecto y pa yega na un concepto di ley. Mester enfatisa cu Hulanda tambe tabata involucra den e proceso aki y tabatin su exigencianan. Mientrastanto e pasamento di ley LNT aki a bira un condicion tambe cu Gobierno mester cumpli cu ne pa por duna e 5% di salario bek na sector publico y semi-publico.
Pero ta bon pa para keto un rato na e realidad di e situacion actual pa loke ta trata e salario di e topfunctionarisnan, esta e salario di e.o., director y algun managers. No obstante e exigencia di Hulanda, ta bon nos papia di echo cu pa hopi aña discusionnan a ser hiba riba e structura salarial di nos companianan estatal, di contratonan lucrativo y despropocional, handshakenan miyonario, bonusnan exagera y cubrimento di gasto personal. Un wildgroei di salario cu no ta hustificabel ni realistico y cu den un cierto situacion a crece te den un suma manera 695.000 florin pa aña cual ta casi 58.000 florin pa luna. Esaki ta casi 4 biaha mas cu nos Minister-President. Un desaroyo cu a keda tolera y aproba pa e huntanan di supervision durante añanan y cu a culmina cu awe mester percura pa un ley pa crea un plafond pa e salario di e topfunctionarisnan di nos entidad publico y semi-publico keda regula.
Durante reunion AVP a ataca nos minister-president y a yam’e pa delaster un cos. Enfatisando cu argumento a caba cu nan. Sigur durante e reunion a keda demostra ken ta hunga ken contra otro y ken ta hunga wega politico. Pueblo por ta sigur cu no ta nos Fraccion y tampoco nos minister-president. Nos Fraccion a encamina un proceso caminda a reuni cu stakeholders, a scuchanan y a presenta un amienda y 3 mocion caminda a duna oido real na nan preocupacionan. Kico AVP a haci? Nada! Ningun proposicion pa cambio of ahustacion mediante un amienda. Simplemente a vota CONTRA perhudicando y purba di obstaculisa e posibilidad di Gobierno pa no paga e 5% na nos empleadonan publico y semi publico. Mas bien durante reunion a haci politikeria sin brinda un solucion. Cual nos a bin ta custumbra di nan.
Amienda y Mocionnan
Nos amienda a percura pa e siguiente cambionan. Nos a cambia e salario maximo stipula, door di mantene e salario di minister, di cual tambe nos minister-president, sin e recorte di 25%. Esaki mirando cu e recorte aki ta uno temporal y pa nos Fraccion pa fin di e aña aki lo termina. Otro cambio ta trata e periodo transitorio cu nos a cambia di 2 pa 5 aña. Caminda den e prome dos añanan no lo bin cambio y den e di 3 te di 5 aña e recorte te cu e norma mester tuma lugar. Por medio di e 3 mocionnan nos a duna e debido atencion na entre otro e siguiente aspectonan di preocupacion: posibel efecto di trickle down, risico di brain drain y stipulacion di kader y criteria pa otorga excepcion di e norma maximo of exoneracion di e ley LNT pa por screen peticionnan pa esaki.
Ta bon pa pueblo ta consciente di e hecho cu den e ley tin un articulo cu ta indica cu despues di 3 aña Gobierno mester evalua e efectividad y efecto di e ley aki. Un momento cu sigur lo keda tuma pa realisa cambio si esaki ta necesario.
