Gobierno a tene un rueda di prensa pa elabora riba Premio Excelencia den Deporte. Minister di deporte a hiba palabra y expresa su amor pa deporte, caminda esaki a nace na momento cu a cuminsa traha na Ministerio di Labor, Cultura y Deporte na 2002 y a crece ora e tabata presidente di e Weganan di Reino di aña 2003 pa 2010.
Durante e periodo aki a siña conoce e mundo deportivo na Aruba hopi di cerca, a cera conoci cu e federacionnan, boluntarionan y nos deportistanan.
Na mes momento a gana experiencia:
– E balor di deporte pa nos pais;
– E balor di deporte pa formacion di un nacion;
– E balor di deporte pa formacion y desaroyo di e deportista y;
– E balor di deporte pa e famia.
P’esey mes semper a sostene y ta aporta na e proyectonan cu tin como meta pa promove deporte y crea estimulo y balor pa nos deportistanan. Premio Excelencia den Deporte ta un di nan. Den pasado e tabata yama Simplemente Deporte y a traha hopi di cerca cu e organisacion e tempo ey.
E aña aki lo tin 141 nominado, pa loke ta trata e añanan 2019 y 2021. A enfatisa e hecho y a dirigi su mes na e hobennan, bisando cu nan mester sinti nan mes honra y orguyoso di a keda nomina pa nan Federacion. Pasobra esaki ta muestra cu nan sacrificio, dedicacion, disciplina y logronan a resalta.
Na mes momento a gradici y felicita e mayornan cu nan sosten y guia brinda na nan yiunan. Nan tur, cada un riba nan mes, ta un ganado(ra) y a felicita nan pa esaki tambe.
Mas cu claro a aplaudi e echo cu Minister Endy Croes ta continua cu e premio aki y un biaha mas nos deportistanan lo bay experiencia un anochi di gala specialmente organisa pa nan.
