Shadira Croes ta anota tres gol pa La Fama Damas logra triunfo

645

Dialuna anochi e campeonato di futbol femenino organisa pa AVB a continua den stadion Guillermo Prospero Trinidad na Dakota, cu e partido entre La Fama y Riverplate.

Esaki tabata di cuater encuentro realisa entre e dos ekiponan aki caminda den e prome wega di campeonato, Riverplate a logra un triunfo cu anotacion di 2-0 pero despues La Fama ta logra tres triunfo sigui cu scorenan di 3-0, 5-0 y dialuna ultimo cu anotacion di 4-1.

Un triunfo cu practicamente ta sigura La Fama e di tres posicion den e campeonato logrando un total di 15 punto y lagando Riverplate na di cuater puesto cu 12 punto pero cu dos wega mas hunga cu e ekipo di Savaneta. Dialuna anochi La Fama a subi tereno cu Hadassah Kock den gol, den defensa a hunga Jeanella Kock, Avril Maldonado, Francien de Windt y Tatiana Dangond.Den medio campo a hunga Shekina Chirino, Lorraine Oduber, Edriana Molina y Stacey Lampe mientras cu dilanti a hunga Shadira Croes y Kimberly Soliana.

La Fama cu ta conta cu e ekipo mas hoben den campeonato, a cuminsa pa domina e accionnan pero e pasonan den e periodo aki tabata inefectivo y no a crea mucho problema pa e defensa di e muchanan di Madiki. Pero na di 16 minuut tabata un hugada di Shadira Croes kende ta bay laga defensa y ta kita portero di Riverplate cu a Sali na su encuentro pa despues deposita e bala den gol pa duna La Fama bentaha di 1-0. Riverplate den e periodo aki a trata di yega na un gol pa medio di contra atakenan y na un ocasion tabata cerca di e gol di empate pero portero Hadassah Kock a trece salbacion.

Den di dos mita La Fama a sigui domina e encuentro pero ainda no hungando mucho organisa y e resistencia di Riverplate a dura te na di 65 minuut ora cu un biaha mas Shadira Croes ta cobra un tiro liber di leu pero c’un poderoso tiro su ta subi y despues baha di repiente, e ta sorprende portero di Riverplate pa duna La Fama bentaha mas comodo di 2-0. For di eynan bay ariba e wega a bira den un solo direccion y Riverplate a haya mas problema ora c’un hungado a haya carchi cora lagando e ekipo cu 10 hungado caminda un rato despues un biaha mas Shadira ta ricibi un paso di medio campo y ta bay laga e defensa y converti e oportunidad aki pa duna su ekipo bentaha di 3-0. Riverplate sin enbargo ta sigui lucha y ta bin desconta na di 72 minuut ora cu defensa di La Fama a duna dos tiro di skina tras di otro y asina e score a bira 3-1.

Casi den final di e partido tabata Stacey Lampe kende ta combina cu Shadira y ta logra pone e bala den net pa asina pone e score final para na 4-1. La Fama su proximo encuentro lo ta otro siman dialuna 16 di Maart pa 8’or di anochi contra di RCA den Compleho Deportivo Guilermo Prospero Trinidad mientras cu Riverplate ta mira accion bek tambe dia 16 di Maart ora cu e enfrenta e ekipo di Britannia.

Comments

comments