Parlamento ta preparando pa Presupuesto 2018 cu lo wordo trata cuminsando diahuebs awo.
Parlamentario Setty Christiaans-Yarzagaray ta duna di conoce cu Parlamentarionan di Fraccion di MEP desde cu e documento di Presupuesto 2018 a yega Parlamento, nan ta studiando esaki tur dia.
Cada gobierno, momento cu e ta goberna, ta formula su plan di maneho pa un pais, cu ta normal tambe. Diferente na con AVP a hiba su maneho di inverti den infrastructura, gobierno di MEP awor ta dicidi con e ta pensa ta miho pa dirigi pais Aruba teniendo e hende central.
Den e documentonan di presupuesto ta inclui e FEM (Financial Economic Memorandum) cu ta indica den cua aña pais Aruba lo yega na un surplus atrobe, cu ta na 2021. Lo mester a yega na un presupuesto balansa awo caba, sinembargo esaki no a pasa pa motibo di un mal maneho financiero di gobierno anterior ademas di no a entrega cifranan corecto.
“No por tin un presupuesto balansa basa riba informacionnan cu no ta cuadra cu realidad. Gobierno anterior a hiba un maneho iresponsabel na unda ta dicidi di keda sin paga SVB y AZV of APFA pa mustra cu ta cumpli cu norma. Hasta a pasa un ley pa un kweitschelding di 102 miyon florin di placa cu gobierno tawata debe SVB”.
Den e raport di FEM, cu ta obtenibel publicamente, ta mustra e caminda cu Gobierno aki ta bay hiba pa sanea finansas publico, presentando cifranan real con e debe actual ta y cu na aña 2021 lo yega na un surplus. Segun e Parlamentario, ta logico teniendo na cuenta cu e debe di nos pais ta un debe astronomico, interes pa paga y finansas di pais cu den un aña e Gobierno actual lo no por sanea e situacion cu Gobierno di AVP a hinca nos pais aden den 8 aña
Segun e Parlamentario, oposicion a hiba e pensamento cu ora MEP drenta gobernacion, lo bay masacra e pueblo sabiendo cu MEP semper a hiba un maneho pa sanea e situacion financiero economico di Aruba despues cu AVP ta daña tur cos atrobe door di maneha con cu ta.
Presupuesto 2018 hustamente ta purba rectifica algun cosnan cu a bay robes den pasado y logicamente awo CFT, cu no tin distinction entre colo politico, ta bisa cu pa tanto tempo a wak cosnan bay fout y awo ta yega e momento pa hacie bon. Y esaki ta loke Gobierno actual lo haci tambe tumando su responsabilidad pa haci’e di e forma corecto.
Lamentablemente, pa e recuperacion y pa un finansas publico mas balansa, esaki tin un introduccion di un crisisheffing pero na mesun momento ta tene cuenta cu pueblo. E ser humano ta wordo poni central y ta tene na cuenta e gruponan vulnerabel den nos comunidad debidamente balansando e efecto cu e crisisheffing lo tin riba nan. Entre otro, mester tin espacio pa baha prijs di awa y coriente y prima di AZV lo baha di 10.5% pa 6.5% pa pensionadonan. Otro posibilidadnan cu Gobierno ta trahando riba dje ta pa reduci / elimina belasting pa grupo di pensionadonan. Reparatietoeslag lo wordo aumenta pa esnan cu ta cobra un solo pensioen y ta cay den e drempel di pobresa.
E Parlamentario ta bisa cu den e “herstel pad” no mester wak e parti negativo solamente di un crisisheffing si no cu lo bay na tene cuenta cu e ser humano mas vunerabel door di brinda nan un poco mas espacio pa resta mas placa den nan cartera. Al contrario na e maneho di Gobierno di AVP cu a concentra mas tanto riba infrastructura cu na final di dia no a trece progreso pa e ser humano y hasta problemanan social no a haya e debido atencion y a escala tremendamente den e ultimo añanan.
Parlamentario Setty Christiaans-Yarzagaray a enfatisa cu por a tuma nota cu e Gobierno actual a dicici di goberna na un manera responsabel pa sanea y maneha finansas publico na un forma realistico y optimal na mes momento teniendo na cuenta e aspecto di bienestar y desaroyo di e ser humano.
