Un asunto cu ta yega cerca na curason di parlamentario Setty Christiaans-Yarzagaray ta
relaciona cu e derecho di animalnan. Den e conferencia di prensa ultimo sra. Christiaans-
Yarzagaray a trata e topico aki, caminda el a referi na e protesta recien di un grupo di
ciudadanonan cu kier mira un paro na e terminacion di bida di animalnan indesea.
Alabes e meta di e protesta tabata pa conscientisa comunidad con pa trata animalnan indesea pero tambe con pa yega na terminacion di nan bida den un forma responsabel. Aki a ser treci pa dilanti e trabao di e organisacion Crioyo Trappers cu ya a presenta un stappenplan cu posibel solucionnan na gobierno.
Sterilisacion
E enfoke ta keda riba conscientisacion ya cu segun sra. Christiaans-Yarzagaray “e parti con ta conscientisa ta hopi mas importante cu con pa termina bida, pasobra e mihor balansa ta cu no ta yega na terminacion di bida di animal”. Cifranan ta indica cu e terminacion di bida di
animal a baha for di 800 te cu 400 pa aña. Riba e parti di conscientisacion di nos comunidad
e parlamentario ta dispuesto di duna su aporte y tambe trece posibel solucionnan. E ta aplaudi e trabao di e fundacionnan manera Stimami Sterilisami cu tambe ta busca solucionnan
mediante campaña di sterilisacion di tanto cacho como pushi. Companianan grandi den sector
priva ya ta yudando den e campañanan aki.
Conscientisacion
Di parti Parlamento sra. Christiaans-Yarzagaray lo wak kico tin caba y kico lo por bin cu ne
pa yuda stimula of conscientisa e pueblo riba no termina bida di animal pero tambe con pa
cuida of reduci asina tanto animal na Aruba. Hopi biaha ora ta termina bida di un animal ta
pasobra ya e ta den un estado di salud cu ta mihor pa sac’e for di su pena. E forma con nan ta termina e bida di e animalnan ta sosode por medio di un angua pa pone e animal drumi. Sra. Christiaans-Yarzagaray a termina bisando cu “tur hende cu kier aporta na e conscientisacion y riba e reduccion di animalnan cu nan bida ta wordo termina pa aña, ta un aporte grandi. Menos animal cu bo por pone drumi den un aña, mas cerca bo tin un mihor bida humano”.
