Scolnan ta habri nan portanan parcialmente otro siman. Esaki ta trece cu ne hopi medida di precaucion awo cu Aruba ta den su di dos ola di coronavirus (Covid-19).
Te na e momentonan aki Aruba tin 1848 caso positivo, incluyendo e 100-nan di e prome ola di Covid-19 cu a surgi den luna di maart ultimo. Di e grupo aki solamente 34 caso positivo ta di hendenan cu no ta di Aruba. Y 608 persona a recupera.
Segun informacion di SIMAR, tin 72 mucha / hoben infecta cu coronavirus te aworaki. Pero no tin ningun mucha of hoben interna. Nan tur a contagia via di nan mayornan y dos mucha di entre 12 y 18 aña no a mustra sintoma di griep mes.
Den e categoria di peuter cu ta di 0 pa 3 aña tin 3 caso di contagio; den categoria di 4 pa 7 aña (kleuter) tambe tin tres caso; den e siguiente categoria di scol basico, di 8 pa 12 aña tin 2 contagio y den e categoria di hobennan di 13 pa 18 aña tin 64 caso di contagio. Contando cu den e diferente categorianan aki di scol tin rond di 20 mil studiante (di peuter te scolnan secundario), e cantidad di contagio ta 0.3% mas o menos.
Esaki ta informacion cu a manda pa e sindicato SIMAR den cuadro di e maneho transparente pa mantene tur organisacion na altura di datonan.
Di otro banda por bisa cu a test te cu ayera 20.212 persona di cual 9227 ta testnan haci na aeropuerto.
