Seshon di informashon pa mishon di invershon 

Kámara di Komèrsio i Industria ta fasilitá un seshon di informashon dia 21 di ougùstùs próksimo tokante e mishon di invershon for di Hulanda ku lo tin komo enfoke: proyektonan disponibel pa invershon den sentro di siudat.

E mishon aki lo tin komo prioridat e siguiente áreanan den sentro di siudat: Otrobanda, Pietermaai, Punda i Scharloo.

E mishon lo tuma lugá di 10- 12 di òktober 2019 aki na Kòrsou. Promé ku e evento aki tuma lugá, aktornan lokal lo tin oportunidat pa haña informashon tokante kon nan tambe por forma parti di e evento aki. 

 

E seshon di informashon dia 21 di ougùstùs ta pa e siguiente kompania i personanan: primeramente esnan ku tin proyektonan di invershon; ku tin un tereno, un edifisio den e áreanan aki na benta òf disponibel pa proyekto. Tambe esnan ku ta institutonan finansiero, invershonista lokal òf ku tin kapital disponibel pa hasi desaroyo den e áreanan ariba menshoná. Adishonalmente esnan ku tin proyektonan ku nan lo ke desaroyá den edifisionan den sentro di siudat.  Finalmente tambe tur empresario ku por fasilitá desaroyo di proyektonan direkto òf indirekto den konstrukshon òf maneho di proyekto pa e diferente invershonistanan ku lo bishita Kòrsou na òktober 2019.

 

E meta di e grupo organisadó di e mishon aki, Stuurgroep Investment Summit Willemstad, ta pa katalisá desaroyo den sentro di siudat, atraé invershon direkto pa Kòrsou i influensiá un empuhe positivo pa desaroyo ekonómiko pa Kòrsou. 

 

Kámara di Komersio ta sostené e inisiativa aki komo parti di e komishon di organisashon. P’esei Kámara di Komersio ta invitá tur empresario i partikularnan ku ta kuadra ku e deskripshon ariba menshoná pa partisipá na e seshon di informashon dia 21 di ougùstùs na Kámara di Komersio. 

 

Esnan ku ta interesá den partisipá den e desaroyo aki por tuma kontakto ku Kámara di Komersio via di [email protected] pa inskribí.

Comments

comments