Servicio di Museo Arqueologico Nacional Aruba Informacion y actividadnan

145

Museo Arqueologico Nacional Aruba (MANA) ta contento pa  anuncia cu desde 1 di juni  awor lo amplia su orario pa publico pa ricibi bishitante. Salanan di exposicion permanente y sala di exposicion temporario  lo habri di 9.30 di mainta pa 4.30’or di atardi di dialuna pa diabierna. 

Pa evita posibilidad di contagio ta pidi bishitante pa  disfruta di e exposicionnan solamente cu wowo y abstene di  mishi.  Ta rekeri pa mantene distancia fisico, uza handsanitizer na entrada y sigui instruccionnan presente.

Mientrastanto a cuminsa trece mas informacion di nos Museo y Aruba su arkeologia via media social y lo sigui amplia esakinan.   MANA a keda brinda  informacion di nos historia Indjan e.o. na  alumno di scol cu tin mester di esaki pa projecto di scol. Pa cualkier pregunta of sugerencia  por mand’e na email: [email protected].

Actualmente MANA hunto cu Fundacion Museo Arubano (FMA) ta sondeando e posibilidadnan con pa trece un programa  vacacional den periodo di vakantie grandi pa nos muchanan. Tambe MANA y Stichting Rancho ta trahando riba actividad conhunto. Stichting Rancho ta bay ofrece ‘walking tours’ den  e bario di Rancho combina cu un bishita na MANA. Un otro accion cu ta den tapara ta bendemento di e publicacionnan di MANA na prijsnan special.  Keda sigui nos riba facebook Archeo Aruba  y National Archaeological Museum Aruba pa mas informacion tocante di actividadnan di MANA y aliadonan.