Serlimar ta conta cu proteccion di Corte pa no mand’e bancarota

Como cu e compania Servicio di Limpiesa di Aruba (SERLIMAR), cu tin un status Sui Generis den Gobierno, ta den problema financiero serio, a bay Corte ayera y abogado mr. David Kock a logra convence Hues pa otorga e compania Surseance van betaling pa un tempo. Corte a bay di acuerdo y na mes momento a nombra abogado mr. Geert Rep como su representante den e compania, pa supervisa con ta maneha den momento aki di crisis.

Surseance van Betaling ta un posibilidad den nos codigo civil, den cual Corte ta brinda Bo un sorto di proteccion temporal, den cual no ta necesario pa paga bo debenan. E ta un instrumento cu ta uza pa companianan cu haya nan mes den problemanan financiero temporal. Pa logra obtene e status aki, mester haci un peticion formal na Corte. E compania mes mester pidi pe, pues abo no por pidi nunca pa un otro compania. Ta necesario pa tin un abogado den e proceso aki. Hues ta nombra un Hues Comisario pa supervisa e procedura y ta nombra un abogado como “bewindvoerder”.

Cos ta serio: Abogado David Kock ta conta e motibo cu ta pidi corte wanta cu pagonan riba cobransanan contra Serlimar

Posted by 24ora on Wednesday, May 20, 2020
Loader Loading…
EAD Logo Taking too long?

Reload Reload document
| Open Open in new tab

Download [40.03 KB]

Mester menciona cu, ta for di diabierna caba abogado mr. David Kock a entrega e peticion formal aki na Corte y nos a informa dialuna mainta trempan den forma di exclusividad. Hopi a cuestiona si ta posibel cu un compania di Gobierno por bay bancarota, pasobra na final Gobierno ta keda responsabel pe. Of tambe si por ehempel e creditornan por pone beslag riba Gobierno si Serlimar debe nan.

E gastonan di Serlimar a aumenta di 18,4 miyon florin den 2016, pa 25,4 miyon den 2017, pa 32,1 miyon den 2018 pa un pronostico di 39,4 miyon florin den 2019. Den otro palabra, e gastonan di Serlimar ta pronostica di ta mas cu dobel e aña aki cu den aña 2016, un aumento di 21 miyon florin. Pa aña 2018 Serlimar a perde 5,2 miyon florin, mientras cu na 2017 y 2016 Serlimar a raporta un perdida di 4,8 miyon florin y 1,9 miyon florin respectivamente. 

Por lo menos un di e creditornan grandi ta e conpania cu a haci un “financial lease” pa adkisicion di e trucknan di sushi nobo. Serlimar a prefera di lease di un compania, cu a regla solamente e financiamento, en bes di e mes bay banco y cumpra e trucknan. E compania ey awo ta por lo menos un di esunnan cu no por cobra, pero dia a firma e acuerdo di lease, Minister Otmar Oduber tabata sinta na mesa ey. Pues te unda Gobierno ta responsabel e ora pa e e debe?

Ora cu Minister Otmar a ripara cu e no tin sosten den Parlamento pa pasa e cambionan den ley pa por logra mas entrada pa Serlimar, el a laga organisa un manifestacion contra su mes, pa pone presion riba e Fraccion di MEP. El a logra parcialmente, pero a hinca MEP den problema serio cu perdida di un asiento (Daphne Lejuez) y cu cnsecuencia cu te awe e ley no a pasa!

Trahadonan y awo specialmente e contratistanan ta teme cu nan salario ta core peliger mirando cu e compania no tin placa pa paga debenan pisa cu nan tin. Di otro banda, ta teme tambe cu e creditornan lo no por pone beslag awo riba fondonan di e compania pero si por stop di bende nan producto of servicio. Por ehempel pa combustibel, cu si CITGO cera cuenta, cu awo ta hopi halto mes, anto mesora ta stagna operacion di Serlimar.

Hecho ta si cu e compania a haya mas placa di Gobierno den e ultimo dos presupuestonan compara cu tur otro añanan den su existencia. Na un forma delibera ex Minister Otmar Oduber a yena e luga cu mas trahado, a cera contractnan lucrativo cu patrosinadonan di su partido y amigonan personal, cu awe Serlimar a yega na un skina dificil pa sali for di dje. Pa colmo varios di e contractnan cera no a yuda e compania cu nada. Por ehempel, esun pa maneha Seri Tijshi, cu Minister Marisol Lopez mester a cancela y otorga un otro compania debi cu e sponsor di POR tabata ocasiona holos stinki den henter e bario. Otro tabata, cu e mesun sponsor aki, pa cumpra un Incinerator cu di aña pasa ta para na Parkietenbos sin por traha te awe!

Celebrando e firmamento pa e “financial lease” di 22 truck pa Serlimar cu ta costa mas o menos 5 miyon pa cumpra pero a fia 12 miyon pa esaki. Ta por lo menos un di e decisionnan robes cu ex-Director Davelaar a tuma, bou supervision di Minister Otmar Oduber.

Serlimar casi a bira un agencia di propaganda pasobra tabata patrocina cantantenan, DJnanby personalidadnan cu tabata cobra pa luna, cu nan potret riba trucknan di sushi, ta sponsor concierto y hopi mas. Tabata manera e pelicula di Titanic, den cual e orkesta ta sigui toca mientras e barco tabata sink. Awe e Minister mes no tey mas, pero a bay laga un desaster atras, cu awo Minister Lopez a hereda, pa colmo di su mesun lider di partido.

Ayera Hues mr. Verhoeven a bay di acuerdo cu e peticion pa otorga Serlimar e status di surseance van betaling. A acorda cu Serlimar mester inventarisa tur su debenan y presenta atrobe aki 3 luna ba Corte hunto cu e creditornan pa asina mira con ta sigui cu e compania. E caso ey lo tuma luga dia 26 di augustus. Mientrastanto Corte ta protega Serlimar pa evita cu ningun otro compania of creditor por pone beslag riba nan cuentanan of nan propiedadnan.