Serlimar no por paga salario: A hinca e compania den hopi debe!

E situacion na Serlimar ta di preocupacion. E Minister saliente y e dos directornan a hinca Serlimar den un situacion financieramente precario, dor di aumenta huur barbaramente, busca trucknan via financiamento caro y a yena e compania cu amigonan y campañadonan. A conta cu e ley lo pasa pa cobra pueblo mas, pero te ainda no tin consensus politico. Minister Evelyn Wever a haye ta bay Parlamento awe 12:15pm pa pidi 800 mil florin urgente di Gobierno, pa e compania por cubri debenan, entre otro salario di su trahadonan.

Pa prome biaha cu Serlimar a haya seis miyon florin extra y awe den december no tin placa mas pa paga salario di trahado na tempo. E trahadonan mester a cobra dia 13 di december. Awor a haya un memo unda ta notifica cu lo paga otro siman sin menciona dia specifico. Ainda no tin splicacion con Serlimar lo sali for di e situacion aki.

E director Henley Davelaar a bin for di Corsou, pa maneha e compania di Aruba. Ta bou su maneho y responsabilidad, e compania a bay den asina tanto debe, te cu ta cuestiona si ta den forma delibera a maneha e compania mandand’e den un pos financiero asina hundu, cu ta casi imposibel salb’e.

E dos directornan Marelva Wever y Henley Davelaar hunto cu Minister Otmar Oduber a hinca Serlimar den e problema aki y Raad van Toezicht, encabesa pa Giovanny van Wijk ta firma bay gol. Nan a apoya Minister Otmar Oduber completamente, incluyendo un campaña publicitario miyonario.

Marelva Wever ta e director financiero di e compania. Ta bou su maneho e compania no a produci relatonan di gasto y entradanan for di algun aña caba. Parlamento anualmente ta aproba fondonan pa Serlimar, sin por mira unda e placa a bay ni cuanto placa a drenta. Ta comosifuera ta manehando un barco sin rumbo!

Tur loke ta pasando awe ta motibonan pakico Minister Otmar Oduber e tempo aya no tabata transparente cu e cifranan di gastonan cu tabata ser pidi na Parlamento. A pidie varios biaha. Hasta e Parlamentario Daphne Lejuez a pidi esaki y nunca a haye pa mira. Tur biaha e mandatario tabata sconde e cifranan.

Seis luna pasa e Incinerator chikito mester a drenta den funcion y te awe ainda e ta benta riba Dump sin cu el a traha. Ta papia di miyones di florin cu a bay pa “e amigo” di e Minister cu ta un di e sponsornan grandi tambe di e grupo di carnaval TOB.

E invitacion pa reunion urgente awe den Parlamento. Mester 800 mil florin sino Serlimar no por paga salario!

Awe ni Christmas Dinner y tampoco un voucher pa busca algo extra manera den pasado no tin pa e trahadonan di Serlimar, pero amigonan di Minister Otmar Oduber si a saca potret na grandi riba trucknan di sushi, cobrando sumanan cuantioso, cu de facto ta placa di e trahadonan.

Giovanni van Wijk ta Presidente di Hunta di Supervision di Serlimar. E ta personalmente responsabel awo pa e debacle financiero eyden, cu lo costa pueblo pagado di belasting hopi mas. El a permiti conflictonan di interes eyden, cu ta bale la pena awo haci un investigacion forensico pa mira con e “liñanan” ta core den e compania. Den terminologia di investigacion nan ta bisa “Follow the money”!

E trahadonan rabia awe ta culpa Davelaar, Wever, van Wijk y Otmar Oduber di a hinca e compania den un buraco financiero asina hundu, cu ta dificil sali for di dje. E Director ta biba den cas luhoso paga dor di Serlimar, via e mesun agencia di e casa di e Presidente di Hunta di Supervision, pa mustra con conflicto di interes ta “domina” tumamento di decision den e compani estatal. Trahadonan kier un fecha cla cu ta paga nan salario, sino por spera accion den dianan di fiesta venidero!

Noticia relacionaMas for di e autor