Serlimar, por medio di Minister Otmar Oduber a anuncia e siman aki cu e leynan ta kedando cla pa bay Parlamento pa regula e formula con ta cobra y yega na fondonan pa por maneha e compania. Ta parce cu Gobierno lo a cambia di opinion pa laga cada ken scoge ken ta recoge su desperdicio y awor ta indica cu tur hende, tur comerciante y tur turista mester paga Serlimar, sea cu nan ta uza nan servicio of di nan competencia.  Obviamente esey lo elimina tur competencia y Serlimar lo keda cu e monopolio.

A busca 18 truck di sushi nobo, pues awo mas cu nunca ta necesario pa keda cla cu e aspectonan financiero pa e compania por maneha den forma sano y solido. Pa esey, tur hende mester paga, tanto e casnan, comercio y hasta turistanan. E ultimo aki sinembargo no ta conta cu sosten di AHATA. Mester bisa cu na principio ATA a mustra Gobierno cu tin espacio pa cobra e turista mas pa maneho di desperdicio, pero den un carta recien firma pa AHATA y ATA, a papia henteramente un otro idioma y a suplica Gobierno pa no aplica e cobransa asina sin mas!

Minister Otmar Oduber a anuncia: Na augustus lo trata ley den Parlamento pa Serlimar por cobra casnan, comercio y turistanan pa e trabou di recogemento y procesamento di sushi riba nos isla.

Posted by 24ora on Thursday, July 11, 2019

Serlimar mester tin un garantia di entrada fiho tur luna pa por cubri su gastonan y resta pa haci inversion den ekipo nobo y recursonan humano. Manera ta conoci, e formula pa cobra comunidad no a keda cla. A papia un tempo pa cobra den recibo di utilidad, pero no a logra. Despues via Departamento di Impuesto pero ey tampoco no a logra. A pensa pa haci’e via erfpacht pero ey tambe parce a bin contratiempo. Y ultimo a keda cu lo manda tur cas un recibo pa nan pasa paga na Serlimar of via transferencia di banco.

Por corda cu Sindicato FTA a pidi pueblo pa NO paga pa recoge sushi pasobra esey ta un responsabilidad di Gobierno. Pa algun luna caba no ta scuchando mas di FTA riba e tema aki, mientras sindicato STA cu ta representa un parti di e trahadonan a boga pa si paga, pa por salba e compania.

Minister Otmar Oduber a anuncia cu Raad van Advies a manda su comentarionan caba riba e ley cu a presenta na nan. Durante e siguiente simannan, probechando e temporada di vakantie (reces), lo contesta tur pregunta pa asina cu Parlamento reanuda trabou ma augustus, trata e ley aki cu prioridad. Den e ley lo regula e formula con ta cobra casnan, comercio y turistanan.

Gobierno a sigura cu sin e sosten y contribucion di pueblo, ta casi imposibel pa e compania por logra. Ta nan intencion pa haci Serlimar e punto central di recogemento di sushi, pero tambe e procesamento di sushi riba nos isla. Den esey ta rekeri contribucion financiero di tur cu ta biba na Aruba of ta pasa vakantie na Aruba.

Gobierno no a bisa nada di e rol cu competencia ta hunga den e asunto aki, den cual comunidad no necesariamente ta mara na tuma servicio di Serlimar, pero cu por opta pa un otro compania, por ehempel Ecotech.

Comments

comments