Tin preparacion andando pa un welga orkestra diahuebs awor. Riba FB di Serlimar ta mustra cu lo sali 2or di marduga pa piki sushi riba diahuebs. A cambia orario di piki sushi. Informacion cu nos redaccion ta hayando for di trahadonan ta indica cu ta preparando un welga dilanti Bestuurskantoor cu trucknan. Kier uza e trahadonan pa mustra comosifuera nan pan ta na peliger. Un show completo y strategia di Minister Otmar Oduber cu su campañador den Serlimar.
E prome shift lo presenta dilanti bestuurskantoor cu e trucknan ora cu nan caba cu nan ruta. E cambio di orario pa prepara e protesta ta bisto riba FaceBook di Serlimar. E cambio di shift aki ta pa pone e trahadonan haci nan trabou trempan. Ora nan caba lo topa cu e di dos shift y lo orkestra e show. Ta obliga e trahadonan bay protesta.
E campañado di POR den Serlimar ta pasa henter dia ta purba hinca cosnan robes di famia de Veer den cabes di trahadonan di Serlimar y asina haci manera famia de Veer ta enemigo di e trahadonan di Serlimar. Esnan rond di Minister Otmar Oduber ta hungando strategianan pa venena e trahadonan di Serlimar contra famia de Veer y uzando ekipo di gobierno pa bay protesta diahuebs.
E flyer mes ta duna instruccion con e cos ta bayendo. Unico cos cu ta consistente ta cu e trahadonan no kier e director mas den Serlimar. E trahadornan ta contra e Director cu ta causando un desaster na Serlimar. Te awe tin incumplimento unda ta kita placa di trahadonan pero no ta draag af esaki na e departamentonan concerni.
E companianan yega na Minister Otmar Oduber si ta haya nan pago sagradamente pa servicionan caro cu nan ta dunando na Sero Teishi. Interesante pa sa si e trahadonan lo presta nan mes pa wordo venena pa e campañador di POR den Serlimar.
E realidad ta cu ningun hende ta bringando pa cera Serlimar. Mas bien ta trahando pa un competencia husto y no dictatorial caminda e Minister kier trece un monopolio riba maneho di sushi. Asina e kier ademas hinca pais Aruba den un debe impagabel cu un incinerator di mas cu 300 miyon dollar. Si esey bira un realidad, tur placa lo bay atrobe pa e compania cu gana e destaho y no pa Serlimar!
Trahadonan mester keda cabes friu y no laga campañado politico di POR mal uza boso diahuebs awor.
