E hoben Ricardo Thomas a drenta servicio di SERLIMAR recientemente y a keda retira, a bay corte unda cu el a gana su caso tambe. Tur esaki debi cu SERLIMAR a haci uzo di informacion bieu pa kit’e for di trabou. Hues a bisa cu no ta haya husto pa haci uzo di informacionnan bieu, y di e forma aki no ta dun’e e chens di rehabilita, manera tur hende tin derecho riba dje.
E trahado hoben aki, a drenta servicio dia 6 di mei, pero a wordo manda cas dia 22 di augustus ultimo y sin pago.
Serlimar ta bisa por medio di su abogado cu no a retira Thomas “op staande voet”, pero dado momento el a cumpli cu un condicion via cual por deshaci di e acuerdo. Dia 9 di mei, nan a bisa, Thomas a firma un documento cu ta bisa cu a yega na e acuerdo laboral, sperando pa e cumpli cu un condicion, via cual e acuerdo aki por wordo anula. Esta e investigacion policial riba su antecedentenan penal. DI e documentacion haya for di Ministerio Publico ta resulta cu e datonan haya rond di Thomas no ta bon, pa cual a cumpli cu e condicion cu por anula e acuerdo laboral.
Pero e Abogado di Thomas a bisa cu e condicion aki cu nan ta papia di dje no ta suficientemente describi y su contenido ta inhusto, pa cual esey caba e informacion haya for di e registro di castigo no por ta motibo pa finalisa e acuerdo laboral.
Den ley tin un provision cu ta splica cual tercer partidonan, cu tin di haber cu un tarea publico. Ta trata di institucionnan cu pa motibonan di interesnan publico por haya e documentonan hudicial. Den casonan di personal, por suministra informacionnan solamente na hefenan di trabou y ambtenaarnan hefe di Aruba (Director di Directie Personeel en Organisatie. Pues den e ley aki no ta duna autoridad na Procurador General pa suministra informacion na director di un entidad publico manera Serlimar. No a keda proba tampoco cu e informacionnan di Thomas a wordo suministra pa motibo di un interes publico, cual ta un condicion pa pasa e informacionnan aki. Serlimar a bisa durante tratamento di e caso cu nan no kier tuma den servicio personanan cu tin un pasado cu husticia, pa evita cu nan ta wordo asocia cu e pasado treciendo problema pa SERLIMAR. Di esaki ta saca afo cu no ta papia di interes publico.
Corte ta bisa cu e funcionario concerni mester evalua si un pasado penal ta forma un problema pa un empleado pa cumpli cu su trabou, sin cu mester duna informacion na tercero di e registro penal.
Den e caso aki no ta bay pa e papel di bon conducta entrega door di PG y cual e mesun Thomas a entrega na SERLIMAR.
Loke ta un problema ta e informacionnan di registro di castigo di Thomas cu SERLIMAR despues a haya for di “justitiele documentatiedienst”. A duna SERLIMAR esakinan en contra di provisionnan di ley. Corte ta bisa cu SERLIMAR no tabata autorisa pa haci uzo di e informacionnan adicional cu el a ricibi di forma ilegal contra di Thomas. Corte ta splica cu e ley en cuestion ta pa preveni cu informacion di pasado penal di personanan por wordo suministra di forma ilimita na tercero, y di forma aki strobando resocialisacion di e hendenan aki den e comunidad. Esey ta masha importante den e caso manera esun di Thomas, unda cu el a comete e delitonan ocho aña pasa ora cu ainda e tabata un menor di edad. Si permiti SERLIMAR haci uzo di e informacionnan aki, Thomas ta wordo perhudica den su interesnan, cu ley hustamente ta trata di protege. P’esey e uzo di e informacionnan ey ta ilegal pa cu Thomas.
Pa e motibo ariba menciona, e acuerdo laboral ainda ta valido pa cual mester sigui pague su salario te ora cu e relacion di trabou keda finalisa di un forma legal.
